AXCP Rəyasət Heyətinin üzvü Fuad Qəhrəmanlı
Etdikləri azmış kimi, indi də Xankəndində hərbi parad keçirirlər.
Bir ölkə o biri ölkənin ərazisində heç vaxt hərbi parad keçirmir. Dünyada sülhməramlıları kimi bir ölkəyə gəlib, sonra da orda hərbi parad keçirmək praktikası yoxdur.
Rusiya rəsmi hərbi bazası olan Ermənistanda bunu etmirsə, Azərbaycanda gəlib bunu etməsi, açıq aşkar dövlət kimi bizim suverenliyimizi tapdamaq, özünü Dağlıq Qarabağın sahibi kimi göstərmək deməkdir.
Ruslar bununla Azərbaycanın Qarabağ üzərində hüquqlarını tanımırıq mesajını verirlər. Azərbaycan hökuməti isə ənənəsinə sadiq qalaraq susur. Bu susmaq nə vaxta qədər davam edəcək?
Rusiya müdafiə nazirinin müavini heç kimdən heç nə soruşmadan Dağlıq Qarabağa gəlir, orada 10 min nəfərlik kazarmanın salınacağını bildirir, ölkə rəhbərliyinin isə səsi çıxmır. Rusiya rəhbərliyində olan şəxslər Qarabağın Rusiyaya birləşdirilməsi haqda sərsəm bəyanatlar verir, yenə heç bir reaksiya yoxdur.
Sanki, Qarabağ sahibsiz ərazidir, orda baş verənlərin heç bizə aidiyyəti yoxdur. Bu rəzalət nə qədər davam edəcək?
Müstəqillik, suverenkik yalnız Qərbdən demokratiya, insan haqları ilə bağlı tələblər səsləndiriləndə yada düşür. Rusiya isə hər nə istəsə edə bilər, sanki Azərbaycan bu ölkənin fedarasya subyektidir. Ermənistan bizdən daha müstəqil görünür artıq.
Rusiya qarşısında dur deyəcək bir iradə görmədiyi üçün, hər gün bizi dövlət və millət olaraq, daha çox aşağılayır, üzərimizdə ağalıq edir. Budurmu müstəqil siyasət?