Milli Şuranın sədri, professor Cəmil Həsənli
“İntellektual” baxımdan dünyanı heyrətə salan iki prezident var. İlham Əliyev – Müzəffər və Qurbanqulu Məlikquliyeviç Berdimühəmmədov – Arxadağ. Bunlar gecələrin gündüzlərinə qatıb hey yazırlar. İlham Əliyevin “çoxçildliyinin” artıq 108-ci cildi ötən ay işıq üzü görüb. 17 il ərzində bu hər ilə orta hesabla 7 kitab deməkdir. Seriyanın adı “İnkişaf məqsədimizdir” adlanır. Ölkə neçə ildir az qala bütün göstəricilər üzrə geri gedir, adam bu “inkişaf” mövzusunda 108 kitab nəşr etdirib, 109-cusu da üzləmə prosesindədir, deyirəm bəlkə bir az yavaşıya.
İnsanların iş, çörək, dolanışıq, uşaq pulu, sosial paket deyib sərgərdan qaldığı bir ölkənin başçısı 2021-ci ilin birinci üç ayında o inkişaf nağılından düz üç kitab “oxuculara” ərmağan edib. Deyirəm bəzi adamlara istedad sonradan gəlir. Vaxtında 150 səhifəlik namizədlik dissertasiyasın yaza bilməyən birisi, məhz ona dissertasiya yazdırdığına görə MDBMİ-nun rektorunu həm rektor vəzifəsindən, həm Kommunist Partiyasından xaric edilən Nikalay Levedevi bədbəxt edib, amma sonra “istedadı” necə parlayıbsa hər biri iki dissertasiya böyda olan 108 kitabın dizin vurub yerə.
Lenin bədbəxt bütün ömrü böyu lampa işığında gözlərini qıya-qıya 55 cild, Stalin 35, Berjnev 9 cild yaza bilmişdi. İlham Əliyevin “çoxcildliyinin” 109-cu cildi artıq bu gün sabah millətimizi sevindirəcək. Bir məsələ var ki, adam oxucularına rəhm eləmir, elə hey kitab buraxır. Dünyanın ən məhsuldar fantastik yazıçısı Ayzek Azimov heç bu sürətlə kitab buraxa bilmirdi.
Kommunist Azərbaycanın bir dövrü var idi ki, ölkəni seyidlər idarə edirdi. Mir Cəfər, Mir Bəşir, Mir Teymur və sair. Bunların içərisində ən savadsızı və ən çox məqaləsi çıxan da Mir Bəşir Qasımov idi. Adam ibtidai sinif və rabfak qurtarmışdı, hərfin birini bildirçin yumurtası böyda yazırdı. Bir gün Bağırov bundan soruşur ki, ay Mir Bəşir axı mən səni yaxşı tanıyıram, bu məqalələri necə yazırsan? Deyir Ağa özüm yazmıram ki, mısl verirəm uşaqlar yazırlar.
İnsafən Qurbaqulu Məlikquliyeviç Arxadağ isə 14 illik hakimiyyəti dövründə hələlik 53 kitab buraxa bilib. Ədalət naminə ancaq o, inkişafdan-zaddan yazmır. Çaydan, dərman bitkilərdən, musiqidən, atdan, itdən yazır. Çay haqqında kitabı ümumxalq “sevgisi” ilə qarşılaşdığı üçün hər il onun “Çay məlhəm, həm İlham” adı ilə yenidən nəşr edirlər. Burada bir kiçik fərq var. İlham Əliyevin 109 çilddən ibarət olan “çoxcildliyini” məmləkətdə 109 adam oxumasa da, Türkmən oxucuları daha sədaqətlidir və Arxadağın bütün “külliyyatını” 7-dən 70-ə bütün türkmənlər oxumağa məhkumdurlar. Allah bizi bu bəladan gözləsin.