Milli Şuranın Koordinasiya Mərkəzinin üzvü Rafiq Manaflı
Bələdiyyə sədrlərindən tutmuş nazirlərə qədər ölkənin məmur kastası şərti olaraq “məmur tənqidçiləri” adlandıra biləcəyimiz yeni tipli “müxalif” tənqidçilərin əlindən özlərinə yer tapa bilmirlər. Yalnız prezident bəy və vitse-prezident xanım tənqiddən kənardır. Məmurların isə ierarxik səviyyəsi nə qədər aşağıdırsa tənqidlər də o qədər sərt, amansız və təhqiramizdirlər.
Aydındır ki, bu hətta icazə verilən qalsın bir yana, tapşırılan qəhrəmanlıqdır. Ətrafda hamı xidmətində dayandıqları ailənin iyrəndiyi adamlardır. Dairə geniş, qadağalar tənqidçinin merkantil maraqları çərçivəsində, ağna necə istəyirsən.
İlham Əliyev öz antidövlət, antixalq, antimilli mahiyyətinin və fəaliyyətinin nəticəsi olaraq real müxalifətlə siyasi mübarizəni bütün səngərlərdə uduzub və indi real müxalifətin təsir gücünü yayğınlaşdırıb azaltmağa ciddi ehtiyac duyur. Son dövrlər ciddi-cəhdlə yaradılan yeni konfiqurasiyalı “dialoq müxalifəti” rejim üçün bu həyati problemin çözümündə Əliyevin əsas silahına çevrilməlidir. Bütün vasitələrlə “dialoq müxalifətinin” xüsusi çəkisi artırılmalıdır və məmur tənqidçiliyi həmin vasitələrin birincisidir.
Bu “tapşlı” qəhrəmanlıq yalnız dialoqçuların təbliği məqsədini güdür və etiraf edək ki, müəyyən nəticələrə də gətirib çıxarır. Hədəfləri müəyyənləşdirməkdə çətinlik çəkən sıravi vətəndaş sərt tənqidləri görür, öz qiymətləndirməsini həmin tənqidlərin əsasında aparır və iki ciddi səhvə yol verir: birincisi, əsas hədəfdən yayınır, ikincisi, konsolidasiya ünvanını itirir.
Və bir daha izah etməyə məcbur olursan ki, avtoritar, sərt şaquli idarəetmə sistemində hədəf şaqulun zirvəsidir.
Məmur özbaşnalığı anlayışı yoxdur. Məmura özbaşnalıq etməyə imkan, icazə vermək anlayışı var və belə imkanları, icazəni onlara İlham Əliyev verib.