Bəxtiyar Hacıyev
İlham Əliyev hamını bədbəxt edib. Xoşbəxt kimi görünən, altına milyardlar yığmış nazirlərdən tutmuş, daxmada, kirayədə yaşayan, işsiz gənclərə qədər.
300-400 manat maaşla səhərdən axşama qədər iqtidarın hər cür çirkinliklərini müdafiə etmək üçün şərhlər yazan trolları da, ipotekasına və ərzaq xərclərinə zorla çatan maaşı olan orta təbəqəni də, hər ay borcları artan müxalif gənci də.
Qoluna milyonluq saat taxıb, bahalı maşın kolleksiyası ilə sağa-sola şütüyən, amma hüzur tapa bilməyən məmur övladını da, ona baxaraq köks ötürən, anasının müalicəsi üçün bankdan kredit götürən gənc alimi də, Əliyevin adı olduğuna görə haqlı tənqidi posta like qoymaqdan qorxan dövlət qulluqçusunu da.
Növbəti tikiləcək binadan ev almaq üçün iqtidarı tərifləməyə məcbur olan jurnalisti də, QHT kimi fəaliyyət göstərməyə məcbur qalmış siyasi partiya rəhbərərini də, pozulan hüquqlarına etiraz etməkdən belə çəkinən sıravi vətəndaşı da. Mühacir kimi xaricə sığınanıb Vətən həsrəti çəkəni də, iş, karyera imkanlarını, potensialını reallaşdırmaq üçün başqa ölkələrə köçənləri də.
Bəlkə də hər şey başqa cür ola bilərdi. Dövlət rəsmiləri özləri və ailələrinin milyonlar, milyardlar mənimsəməsi üzərində baş sındırmaq əvəzinə bir-biri ilə vətəndaşların xoşbəxtliyi, rifahı üçün yarışa bilərdilər. Bəlkə də İlham Əliyev də rahat-rahat vətəndaşların arasında bulvarda mühafizəçisiz, tək gəzmək istəyərdi, harasa gedəndə yolları bağlatdırmaq məcburiyyətində qalmaq istəməzdi.
Əliyev gedəndən sonra hər şey dəyişə də bilər, dəyişməyə də. Ancaq o bu sistemin başında olduğu müddətcə yaxşıya doğru heç nə dəyişməyəcək. Getdikcə bədbəxt edilənlərin sayı artdıqca artacaq. TVlərdə, instagramda bəzəkli həyatlar təqdim edilsə də, hamı daxildə hüzursuzluq hiss edəcək, binası müasir təmir edilmiş, içində ədalət olmayan Ali Məhkəmə kimi cəmiyyətimizin içində hüzur olmayacaq.