Milli Şuranın sədri, professor Cəmil Həsənli
Bu gün millətin sifəti olan kişilərdən birinin -Əlimərdan bəy Topçubaşovun doğum günüdür. Canın, malın, varidatın bu millətin azadlığı yolunda qoydu Əlimərdan bəy. 160-cı doğum gününə iki il qalsa da, hələ də vətənində, heykəllər ölkəsində abidəsi yoxdur. Milli azadlıq hərəkatının bəlli bir mərhələsində o, ümumtürk, ümummüsəlman tarixinin yaradıcısı rolunda çıxış edirdi.
Əlimərdan bəyin həyat hekayəsi, zəmanəsi və mübarizə çiyindaşları ilə bağlı uzun illər müxtəlif ölkələrin arxiv və kitabxanalarında işləməli oldum. İşlədikcə onun möhtəşəm tarixi portreti cilalandı, dava vəkili kimi əmək fəaliyyətinə başlamış gənc hüquqşünas siyasi proseslərin burulğanlarında bir millətin haqq, hüquq, hürriyyət və müstəqillik davasının vəkilinə çevrildi. Rəsulzadənin dili ilə desək Topçubaşov öz ömrünün heç olmazsa əlli ilini durmadan, yorulmadan xalq və millət işinə sərf etdi.
Əlimərdan bəy haqqında araşdırmalarım bir neçə il əvvəl Bakıda, az sonra Moskvada, bir müddət əvvəl isə London və Nyu Yorkda nəşr edildi. Gələn ay isə bu kitabın Ankarada nəşr ediləcəyi gözlənilir. Rus nəşrinin üz qabığında Əlimərran bəyin müdrük obrazına diqqət yetirin. Bu şəkildə onun par-par parıldayan ayaqqabısı hazırda Azərbaycana rəhbərlik edənlərin sifətindən və vicdanından daha təmizdir.