Ermənistanın keçmiş Prezidenti Levon Ter-Petrosyan hesab edir ki, İkinci Qarabağ müharibəsindəki məğlubiyyətdə hazırda Baş nazir vəzifəsini icra edən Nikol Paşinyan “tək günahkar və məsuliyyət daşıyan şəxs deyil”.
O bu barədə rəhbərlik etdiyi Erməni Milli Konqresin mətbu orqanı “ilur.am” saytında dərc etdiyi məqaləsində yazıb.
Ter-Petrosyanın sözlərinə görə, özünün rəhbərlik etdiyi Erməni Ümummilli Hərəkatından başqa, bütün siyasi qüvvələr 1997-ci ildən bəri Qarabağ probleminin kompromisli həlli üçün ən sərfəli imkanları pozaraq və qarşılıqlı güzəştdən imtina edərək, məhvedici status-kvo-nun qorunub saxlanması yolunu tutublar.
“Nəticədə bu kurs bütün sonrakı Ermənistan rejimlərinin dövlət səviyyəsində yeritdiyi siyasətinə çevrilib və bu gün buna görə tək Paşinyanı günahkar hesab etdikləri fəlakətə gətirib”.
“Bunda “millətin elitası” sayılanların – ziyalı, politoloq, təhlilçi, jurnalist, akademik alimlər, ali məktəb professorları və az qala bütün diaspor milli strukturlarının əksəriyyətinin də məsuliyyət payı var. Sözün qısası, “Hay Dat”-ın müddəaları (“Erməni Məsələsi” – erməni siyasi tarixi, milli-azadlıq hərəkatı, tarixi vətəndə mili dövlətçiliyin bərpası və ermənilərin birləşməsi, Osmanlı İmperiyasında erməni soyqırımın tanınması və s. problemlər cəmi və reallaşması istiqamətində fəaliyyət (xüsusilə xarici diaspor təşkilatlarında)- red.) və “heç bir qarış” tezisini (birinci Qarabağ müharibəsindən sonra erməni qüvvələrinin nəzarəti altında olan keçmiş Dağlıq Qarabağ Muxtar Vilayətindən kənar ərazilərin qismən və Azərbaycan tərəfinin hər hansı güzəşti müqabilində qaytarılması ilə bağlı mövqe- red.) bütün ermənilər üçün Bibliya kimi danılmaz milli dinə çevirmiş siyasi qüvvələrin də…”- Ter-Petrosyan məqaləsində vurğulayıb.
Onun sözlərinə görə, bütün bu qüvvələr Nikol Paşinyanın yekun rolu sayəsində böyük məharətlə Vazgen Sarkisyanın (1991-1992 və 1995-1999-cu illərdə Ermənistanın müdafiə naziri, 1 iyun – 27 oktyabr 1999-cu illərdə Baş nazir. 1999-cu ilin 27 oktyabrında Ermənistan parlamentində silahlı terror aktı zamanı öldürülüb) “iki dırnaqarası vəsiyyətini” yerinə yetiriblər:
“Birincisi: qan bahasına qazanılmış torpağı kağızla qaytarmazlar. Yəni, bu o deməkdir ki, daha böyük qan bahasına qaytarırlar və belə də oldu.
İkincisi: kompromisə məcbur olduğumuz zaman gedərik. Məcburən qəbul olunmuş qərar isə kapitulyasiyadan başqa bir şey deyil.
Haqq üçün demək lazımdır ki, Vazgen, gec də olsa, öz səhvini anlamışdı və bunu Karen Demirçyanla (11 iyun-27 oktyabr 1999-cu ildə keçmiş Ermənistan Sovet İttifaqı Kommunist Partiyasının birinci katibi, müstəqil Ermənistan Milli Məclisinin sədri- red.) yaratdığı blok vasitəsilə düzəltməyə çalışırdı. Əminəm ki, Vazgen Sarkisyanın öz səhvini yenidən dəyərləndirməsi və Karen Demirçyanın müdrikliyi sayəsində Qarabağ tənzimlənməsi prosesi öz həqiqi istiqamətinə qaytarıla bilərdi. Lakin 27 oktyabr cinayəti bu ümidverici prosesə son qoydu”.
Ter-Petrosyan əmindir ki, ölkənin payına düşmüş “bu fəlakətdə xalqın heç bir günahı” yoxdur, məğlubiyyətdə Ermənistan ordusunun da günahı yoxdur.
Onun sözlərinə görə, hakimiyyətin “cinayətkar siyasəti” ucbatından ordu sayca qat-qat üstün şəxsi heyəti və müasir silahla təchiz olunmuş düşmənə qarşı döyüşə qatılıb və sonadək vətən qarşısında borcunu yerinə yetirib:
“Dediklərimin məğzi ondadır ki, əslində bizi Azərbaycan məğlub etməyib, siyasi təfəkkürümüzün inkişafdan qalması üzündən bu məğlubiyyəti öz başımıza gətirmişik… Lakin məsələ bizim bu tarixdən nə ibrət dərsi almağımızdadır”.
Ter-Petrosyan təəssüflə qeyd edir ki, Ermənistanda və diasporada müharibədən sonrakı ritorika “yenə də mənasız xarici aləmdən yardım gözləmə, Azərbaycanın və Türkiyənin ünvanına davam edən əvəzini çıxma və təhdid dolu bəyanatlarla doludur”.
“Şübhəsiz, bu tendensiya seçki kampaniyası zamanı daha da güclənəcək və bu hal heç də ibrət almaq baxımından ümid yeri qoymur. Bu isə o deməkdir ki, xalqı yeni itkilər və yeni məyusluqlar gözləyir,” – Ter-Petrosyan yazıb.
Bbc.com