AXCP sədri Əli Kərimli
Sizcə, insanlar əllərindən alınmış haqlarını nəyə görə heç olmasa, sosial şəbəkələrdə belə tələb etmirlər? Neftin bir barelinin qiyməti yenidən 73 dolları keçdi. Dövlət büdcəsində bareli 40 dollardan hesablanıb. Ölkəyə nəzərdə tutulduğundan artıq xeyli pul gəlir. Təkcə ilin ilk 4 ayında dövlət büdcəsində 700 milyon manat profisit (artıq pul) yaranıb. Pul o qədər çoxdur ki, heç bir ehtiyac olmadan bahalı, dəbdəbəli binaların tikintisinə (və ya bu bəhanə ilə) milyardlarla manatı xərcləyirlər qurtarmır. Rejimin xarici ölkələrdən olan dostlarına açıq tenderlərdən kənar yollarla 100 milyonlarla dollar ötürürlər, pul qurtarmır. Ancaq büdcədə bu qədər profisit olsa da, 120 min nəfərə yaxın təqaüdçünü, əlili pensiya və müavinətdən məhrum ediblər. Hərbçilərin maaşlarını azaltdılar, COVİD19-la mübarizənin ön xəttində olan tibb işçilərinin maaşlarını kəsdilər, pensiya yaşını qaldırmaqda davam edirlər, qiymətləri, gömrük ödəmələrini artırırlar. Müharibə veteranlarının, qazilərin müavinətlərini vermirlər. Qazilərimizin müalicəsini nəinki xaricdə, heç daxildə də təmin etmirlər. Bütün bunları edərkən də büdcədəki 700 milyon manat artıq pulla, 10-larla xarici ölkəyə yardımlar etmələrilə öyünürlər. Sanki xalqa açıq deyirlər ki, sizə verilməli olan vəsaitə qənaəti pul az olduğu üçün etmirik. Tam əksinə, pulumuz çoxdu, ancaq sizlik deyil, siz ən aşağı şərtlərlə yaşamağa layiq insanlarsız.
Rejimin bu insafsızlığı təəccüblü deyil. Ancaq xalqımızın ehtiyac içində yaşamasına rəğmən “xərcləməyə hələlik yer tapmadığınız o artıq qalmış puldan mənə çatanı tələb edirəm” deməməsi təəccüb doğurur. Yoxsulluq içində yaşayan və haqqı əlindən alınan milyonlarla insanımızın haqqını təəssüf ki, yalnız müxalifət fəalları və kiçik qrup ictimai fəallar tələb edir.
Əziz həmvətənlər, sizin üçün hökumətdən iş yeri, haqqınız olan maaş, müavinət, pensiya, diqqət, qayğı tələb edən insanlara siz də dəstək verin. Siz – haqqı əlindən alınanlar bu ölkədə əksəriyyətsiniz. Hüquqlarınızı hamılıqla tələb edəndə siz haqqınızı alacaqsınız, ölkə də düzələcək.