İctimai fəal Bəxtiyar Hacıyev
ABŞ prezidenti C.Bayden dünən Cenevrədə Putinlə görüşdən sonra CNN müxbirindən üzr istəyib.
Görüşdən sonra CNN jurnalisti K.Kollins ona nisbətən xoş olmayan “haradan bilirsiniz ki, Putin davranışını dəyişəcək?” sualı verdi. Prezident nədənsə bu suala qəzəbləndi, geri qayıdıb cavab verdi, sonra da jurnalistə “bunu başa düşmürsünüzsə, yanlış işdəsiniz” cavabı verdi.
Bayden sonradan AF1 təyyarəsinə minməmişdən əvvəl Ağ Ev jurnalistlərinin olduğu yerə yaxınlaşıb, üzr istəyib və “belə ağıllı oğlan olmamalı idim” dedi.
CNN-də danışan jurnalist “bizim işimiz kimliyindən asılı olmayaraq prezidenti sorğulamaqdır, onun hərhansı bir məsələdə nəyi necə görməsini anlamağa çalışmaqdır” dedi.
Dünən bir dostumuz da Putinin prezident kimi Klintonla, Buşla, Obama ilə, Trampla və Baydenlə fotosunu paylaşmışdı. ABŞ 5-ci prezidentini dəyişir, Putin isə yerindədir. Dünyadakı yerləri və nüfuzları da göz önündədir.
Amerika Birləşmiş Ştatlarını dünyanın supergücü edən də belə məqamlardır. ABŞ prezidenti ona xoş olmayan sual verən jurnalistdən üzr istəyir, “kimdi o kopaqqızı, prezidentdən çox biləcək? Basın içəri, ya da saytdan zaddan açıb verin, başı qarışsın” demir.
ABŞ nazirləri, senatorları olduqları yerləri qorumaq üçün “yenə Klinton yeyib, doyub, bundan sonra gələn ac gələcək”, “kim var axı Klintondan daha yaxşısı, gül kimi idarə edir də, oturmuşuq yerimizdə, sakitlikdir, sabitlikdir” demirlər.
ABŞ-ı ABŞ edən vətəndaşların prezidentə hər şeyin ən yaxşısını bilən Tanrı kimi, özlərinə qul kimi yox, prezidenti 4 ildən bir onlara xidmət etmək üçün işə götürən və işdən azad etdikləri şəxs kimi görməkləridir.