İranda bu gün Prezident seçkisidir. Seçkiyə əvvəldən 7 namizəd qatılsa da, bəziləri namizədliyini geri çəkdiyindən onların sayı 4 olub.
Rəy sorğuları mühafizəkar, din xadimi İbrahim Rəisinin seçkinin lideri sayılır, onun əsas rəqibi Mərkəzi Bankın keçmiş rəhbəri Əbdülnasir Həmmati hesab edilir.
Dissidentlər və bəzi islahatçılar seçkini boykota çağırıb. Onların fikrincə, İbrahim Rəisiyə ciddi rəqabət mühiti yaratmamaq üçün bəzi namizədlərin seçkiyə qatılması əngəllənib.
Ali Dini Rəhbər Ayətullah Əli Xameneyi cümə günü səhər tezdən Tehranda səs verib və seçiciləri səsverməyə çağırıb:
“Hər bir səs sayılır… gəlin, səs verin və öz prezidentinizi seçin. Bu, ölkənizin gələcəyi üçün vacibdir,” – o deyib.
İran nüvə layihəsi ilə bağlı ABŞ sanksiyaları ilə üzləşəndən bəri ağır iqtisadi vəziyyət içindədir və bu da iranlılar arasında narazılıqları genişləndirib.
Arasında 40 qadın olan 600 şəxs seçkidə iştirak etmək üçün qeydiyyatdan keçsə də, 12 üzvü olan Qəyyum Şurası yalnız 7 nəfərin namizədliyini təsdiqləmişdi.
Seçkiyə bir neçə gün qalmış namizədləri ikisi İbrahim Rəisinin, biri isə Əbdülnasir Həmmatinin xeyrinə namizədliyini geri çəkib.
Əgər namizədlərdən her biri seçicilərin 50 faizinin səsini birinci turda ala bilməsə, ikinci tur olacaq.
Amerikanın səsi