İctimai fəal Bəxtiyar Hacıyev
Son aylarda İlham Əliyevin adını çəkərək tənqid etməyim bəzilərini narahat edib. Avropaya prezidentin köməkçisinin köməkçisi qismində gedən xüsusi xidmət orqanları əməkdaşlarının kurasiyasında olanlardan tutmuş saxta və nəzarət olunan müxalifətin arasındakı adamlarına qədər mənə qarşı kampaniya etmək tapşırığı verilib.
Bəziləri bilərəkdən, bəziləri isə xüsusi xidmət orqanları əməkdaşlarının təsirinə düşərək, onların atdıqları yemi yeyərək bilmədən bu kampaniyaya qoşulublar. İddia edirlər ki, Bəxtiyar ora-bura CV göndərib, vəzifə istəyib, vəzifə verməyiblər deyə İlham Əliyevi sərt tənqid edir.
İlham Əliyevə qarşı son aylardakı sərt tənqidlərimin səbəbinin kökündə şəxsi bir məqam varsa, o da dövlət orqanlarının mənə qarşı atdıqları şər və bunun bu günə qədər davam etməsidir. Mənim adımdan saxta yazışma düzəldib yaymışdılar, mən bunu DİN-ə də, DTX-ya da, şəxsən Ombudsmana da, Baş Prokurorluğa da göstərmişəm. Aralarında tək Ombudsman bunu qəbul etdi və qəbuledilməz davranış olduğunu dedi, digər qurumlar isə bu günə qədər nə cinayət işi açıblar, nə gözləri ilə gördükləri həqiqəti etiraf etmək kimi ləyaqətli davranış göstərməyiblər, əksinə, 3 aydan artıq müddətdir ki, siçan-pişik oynayaraq ləyaqətsiz, şərəfsiz yol seçiblər. Bir qərarları ləğv edilir, təkrar qərar verirlər. Bu gün də Yasamal Rayon Məhkəməsində eyni məsələ ilə bağlı üçüncü məhkəmə oldu. Anlamırlar ki, hara qədər qaçsalar, ora qədər qovacam, ölkə daxilində olmasa da, Avropa Məhkəməsinə gedəcək bu işlər və şərəfsizlikləri sübut ediləcək əvvəl-axır.
Dövlət qurumları, prezidentin yaxın ətrafındakı rəsmi şəxslər gözləri ilə gördüklərini at kimi dirənərək görməməzlik nümayiş etdirib, şərəfsiz, ləyaqətsiz yol seçiblərsə, mənim də İlham Əliyevi daha sərt tənqidimin səbəbini burada axtarmalıdırlar. Daha yal verib saxladıqlarını öyrədib, başladıqları latteliyi o xətt üzrə davam etdirməməlidirlər.
Nə qədər özünüzü yorsanız da, mən sizin əlaltılarınıza qısa müddət vaxt sərf etsəm də, əsas hədəfim bu nalayiq, şərəfsiz sistemi qurmuş və ayaqda saxlayan İlham Əliyev olacaq. Sizdən fərqli olaraq mən tənqidlərimi şər, böhtan üzərində yox, faktlar üzərində qururam və belə də davam edəcək.
İnsanlar çox yaxşı görürlər ki, on milyon insanın hüquqlarını məhdudlaşdıran, seçkidə səslərini oğurlayan, hər addımda onları soyan, on minlərlə insan ehtiyac içində ən təməl müalicələrini ala bilmədikləri halda dünyanın milyarderlərinə qibtə etdirəcək qədər lüks həyat yaşayan, rəqiblərinə qarşı şərəfsiz mübarizə üsulları seçən, nəhayət xalqın milyardlarını mənimsəyən və beləliklə onun xoşbəxt gələcəyini, rifahını oğurlayanlar və onlara züy tutanlar kimlərdir.
Elin gözü tərəzidir.