Rüfət Səfərov
Fotoda gördüyünüz şəxs Naxçıvan MR-nın sabiq daxili işlər naziri Əhməd Əhmədovdur.
Onu yaxından tanıyanlar əmin edirlər ki, sabiq nazir vurma cədvəlini bilmirmiş. Amma bu, onun karyera pillələrində ildırım sürətilə irəliləməsinə mane olmur, çünki sədr Vasif Talıbovun diqqət və qayğısı ilə əhatə olunur: 1996-cı ildə Daxili İşlər Nazirliyinin Akademiyasını bitirir, dərhal sonra Naxçıvan MR-nın DİN-nin Mütəşəkkil cinayətkarlıqla mübarizı bölməsinin rəisi, Naxçıvan şəhər polis şöbəsinin rəis müavini kimi allahsız əmrləri həvəslə yerinə yetirir ki, bu da onun 16 iyun 2000-ci ilidə Naxçıvan Muxtar Respublikasının daxili işlər naziri təyin edilməsində başlıca rol oynayır.
4 il kifayət edir ki, müdavim partasından durub, nazir kürsüsünə əyləşsin.
Olur, olur, çünki burası Azərbaycandır, xüsusil də Azərbaycanın ayrılmaz hissəsi olan Naxçıvan Muxtar Respublikasıdır. Vasif Talıbovun “muxtar respublikası”.
Əhməd Əhmədov 17 il nazir kimi insan qanı tökür, sahibi Vasif Talıbov qəzəbə gəlmiş hansısa qurbanın barmağını tələb edərkən, qol azlıq edir, birbaşa başı xidməti kabinetin üzərinə tullayır, neçə-neçə ailələri başsız qoyur, nər kimi oğulları sındırır, çilik-çilik edir, qansız üsul-idarənin “qara siyahı”sına düşənlərin üzərində ağlasığmaz işgəncələrin həyata keçirilməsinə dair əmrlər verir, bəzi hallarda özü şəxsən əzab verir. Məsələn, Naxçıvan MR-nın sabiq milli təhlükəsizlik naziri, hazırdasa saxlandığı cəzaçəkmə müəssisəsində sanitar qovşağı təmizləyib, ətrafı süpürən, şəxsiyyətinin bütün tərəfləri “ş”, “ə”, “x”, “s”, “i”, “y”, “y”, “ə”, “t” şəklində ətrafa səpələnən Vəli Ələsgərovu şəxsən işgəncəyə məruz qoyub bu Əhməd Əhmədov!
Təsəvvür edin ki, Ə. Əhmədov V. Ələsgərovun keçmiş əməkdaşlarının bir qismini işgəncə otağına gətirilməsinə dair əmr verib və tələb edib ki, növbə ilə sabiq nazirlərinin üzünə tüpürsünlər, döymək və s. yox ha, yalnız üzünə tüpürsünlər… Bir zamanlar V. Ələsgərovun əmrinə müntəzir olan əməkdaşların yeganə funksiyası üzə tüpürmək olub.
İşgəncə otağındakı səhnəni bir anlıq göz önünə gətirək, əziz dostlar.
“Tragik məzmunlu tamaşanın əsas səhnə tərtibatçısı” kimi general-leytenant Ə. Əhmədovun heç ağlının ucundan belə keçməzdi ki, zaman gələcək, özü də təxminən V. Ələsgərovun qara gününə ortaqlıq edəcək.
Sahibi Vasif Talıbovun əmrlərini əvvəlki kimi həvəslə icra etmədiyinə, müstəqil güc kimi fəaliyyət göstərib, Ramil Usubovun xələfi olmaq eşqinə düşdüyünə görə günün birində qələmi qırıldı, cinayət məsuliyyətinə cəlb edilərək həbs edildi, Cinayət Məcəlləsinin 179.4-cü (mənimsəmə, xüsusilə külli miqdarda ziyan vurmaqla törədildikdə) maddəsilə ittiham elan edildi, bu gün isə Naxçıvan Hərbi Məhkəməsinin hökmü ilə 11 il müddətinə azadlıqdan məhrum edildi.
Şəksizdir ki, hökm qanuni qüvvəyə mindikdən sonra sabiq nazir Ə. Əhmədov istintaq təcridxanasından cəzaçəkmə müəssisəsinə etap olunacaq və sabiq nazir V. Ələsgərovla görüşəcək.
“Əl-ələ verib” işləyəcələr…
Haradasa oxumuşdum: həbs edilən SSRİ Dövlət Təhlükəsizlik Komitəsinin sədri Viktor Semyonoviç Abakumovun dırnaqları çıxarılır, qol və qıçları sındırılır, Lavrenti Pavloviç Beriyadan imdad diləyir, amma bu, olsa-olsa, manyak komissarı daha da vəhşiləşdirir.
Yekunda NKVD şefinin də bənzər aqibət yaşadığı isə hər kəsə bəllidir…