ATƏT-in beynəlxalq müşahidəçiləri iyunun 21-də səsverməyə dair ilkin dəyərləndirmə yayacaqlar
Robert Koçaryanın rəhbərlik etdiyi “Ayastan” bloku vaxtından əvvəl parlament seçkilərinin nəticələrini qəbul etmir və onları Konstitusiya Məhkəməsində mübahisələndirəcək.
Bunu Azatutyun radiosuna blokun liderlərindən biri, Daşnaksutyun partiyasının təmsilçisi İşxan Saqatelyan deyib. O, başqa sualları cavablandırmayıb.
Koçaryanın iyunun 22-də mətbuat konfransı keçirəcəyi gözlənir.
***
Kreml Ermənistandan gələn seçkilərlə bağlı xəbərləri diqqətlə izləyir, seçkidə Nikol Paşinyanın partiyası əsaslı qələbə qazandığını bildirir.
Bunu Rusiya Prezidentinin mətbuat katibi Dmitri Peskov deyir.
“Yerevandan gələn xəbərləri çox diqqətlə izləyirik, seçkinin baş tutması haqda Ermənistanın mərkəzi seçki komissiyasının məlumatını alqışlayırıq. Əlbəttə, Paşinyanın partiyasının əsaslı qələbə çaldığını görürük”, – Peskov jurnalistlərə deyib.
Mətbuat katibi Ermənistan xalqını seçki münasibətilə təbrik edib, Ermənistanı yaxın müttəfiq və tərəfdaş adlandırıb.
***
‘Ayastan’ bloku seçkinin nəticələrini mübahisəli sayır
Ermənistanın ikinci prezidenti Robert Koçaryanın başçılıq etdiyi Ayastan (Ermənistan) bloku seçkinin nəticələrini mübahisəli sayır. Blok bəyanatında dərc olunmuş nəticələrin inam yaratmadığını bildirir.
“Onlar son 8 ayda ictimai həyatda müşahidə etdiyimiz müxtəlif cərəyanlarla, ictimai rəy sorğuları, eləcə də beynəlxalq sorğuların nəticələri və ən nəhayət sağlam məntiqlə kəskin ziddiyyət təşkil edir”, – blokun bəyanatında deyilir.
Blok qeyd edir ki, “qeydə alınmış, eləcə də təxmin edilən pozuntular dərindən və əsaslı şəkildə öyrəniləcək”.
Bütün problemli məsələlər və şübhələr aydınlaşmayanadək “Ayastan bloku seçkinin nəticələrini tanımayacaq”, – bəyanatda vurğulanır.
Azadliq radiosu