Son günlərdə polis zorakılığının artması ilə bağlı hüquq müdafiə təşkilatı olan Müdafiə Xətti bəyanatla çıxış edib.
Müdafiə Xətti daxili işlər oqranlarının əməkdaşlarının dinc şəkildə özlərini ifadə edən vətəndaşlara, sosial, siyasi, hüquqi, mədəni və s. tələblər irəli sürən fəallara, eləcə də qanunsuz ittiham hökmünə etiraz edən məhkum ailələrinə, qadın haqları uğrunda mübarizə aparan xanımlara, yaradıcılıq azadlığından faydalanmaq istəyən aktyorlara və s. qarşı repressiv tədbirlər reallaşdırmalarını dərin narahatçılıqla izləyir.
Müdafiə Xəttinin müşahidələri onu deməyə əsas verir ki, artıq polis öz təyinatından, yəni insanların həyatını, sağlamlığını, hüquq və azadlıqlarını, dövlətin, fiziki və hüquqi şəxslərin qanuni mənafelərini və mülkiyyətini hüquqazidd əməllərdən qorumaqdan nəzərəçarpacaq səviyyədə uzaq düşüb. Polis xüsusi qayğıya ehtiyacı olan, cəmiyyətin həssas təbəqəsini təşkil edən insanlara, hətta qazilərə, şəhid ailələrinə belə zorakılıq tətbiq edir, dinc özünüifadəetmələrin qarşısı kobud və qanunazidd qaydada alınır.
Müdafiə Xətti qeyd edir ki, ötən gün bir qrup feminist Bakı şəhər Xəzər Rayon Polis İdarəsinin inzibati binası önündə aksiya keçirib. Səbəb polisin avqustun 3-də əri tərəfindən başı kəsilərək öldürüldüyü deyilən 23 yaşlı Sevinc Məhərrəmovanın şikayətinin araşdırılmaması, zorakılıq törədən Füzuli Qarayevin vaxtında həbs edilməməsidir. Feministlər polis idarəsinin önündə “Sevincin qatili dövlətdir!”, “Qadın qətlləri siyasidir!” şüarları səsləndiriblər. İnzibati binanın giriş qapısına qan rəngi rəmzi olan qırmızı maye atıblar. Aksiyaçılar- Gülnarə Mehdiyeva, Sevgi İsmayılbəyli və Nərmin Şahmarzadə Xəzər Rayon Polis İdarəsinin əməkdaşları tərəfindən saxlanılıblar, onlara qarşı şiddət göstərilib, döyülüblər, təhqiramiz ifadələrə məruz qalıblar.
Müdafiə Xətti olaraq dinc qaydada etiraz edən xanımlara qarşı zorakılıq göstərən polis əməkdaşlarının hüquq və mənəviyyatla bir araya sığmayan hərəktətlərini qətiyyətlə pisləyirik, daxili işlər orqanlarının istintaq, təhqiqat və əməliyyat-axtarış fəaliyyətində qanunların icrasına nəzarət edən prokurorluq orqanlarından tələb edirik ki, qüvvədə olan qanunvericiliyin tələblərinə uyğun surətdə araşdırma aparıb, baş vermiş ictimai təhlükəli, təqsirli, cinayət qanunvericiliyi ilə cəza təhdidi altına alınmalı olan əməllərə adekvat qiymət verilsin, hüquqi məsuliyyət daşıyan vəzifəli şəxslərin dairəsi müəyyən edilsin.