Milli Şuranın sədri, professor Cəmil Həsənli
Sovet İttifaqı Kommunist Partiyasının XXII qurultayında Stalini şəxsiyyətə pərəstişi kəskin tənqid edildi və 1956-cı ildə XX qurultayda başlanmış iş sona çatdırıldı. XXII qurultaydan sonra SSRİ-nin hər yerində olduğu kimi Azərbaycanda da Stalinin adını daşıyan yerlər, idarə və müəssisələr dəyişdirildi. Bakı şəhərində Stalinin adına olan Stalin rayonu və “Stalinneft”
idarəsi 26 Bakı komissarının adına verildi. Stalin adına Bakı neftayırma zavodu Sov.İKP XXII qurultayı, Stalin adına mədəniyyət sarayı İliç adına, Stalin adına respublika stadionu Lenin adına, Stalin adına maşınqayırma zavodu isə Orconikidzenin adına verildi. Lakin əhali bunu birmənalı qarşılamırdı. Stalinizm insanların həyatına dərindən daxil olmuşdu. Stalinin kiçik şəkillərini sərnişin avtobusları və dövlətə məxsus yük maşınlarına vurulmasının, böyük portretlərinin ayrı-ayrı evlərdə asılmasının qarşısını almaq mümkün olmadı. Belə hallar respublikada geniş müşahidə edilirdi. Hətta, 1963-cü ilin noyabr ayının 7-də Sumqayıt hadisələri baş verəndə nümayişçilər tribunaya hücum edib Xruşşov başda olmaqla Siyasi Büro üzvlərinin portretlərini dağıtdılar və yerinə “qəfil” peyda olan Stalinin böyük portretini asdılar.
Əhali arasında Stalinə pərəstişin davam etməsi ilə bağlı Bakı şəhəri Aşağı Dağlıq küçəsi-79 ünvanında yaşayan Xankişiyev Nazim Səməd oğlunun Nikita Xruşşova məktubu çox maraqlıdır.
O, yazırdı: “Hörmətli yoldaş Nikita Sergeyeviç Xruşşov! 1962-ci il iyunun 22-də mən Bakı şəhəri Tver küçəsi 53 ünvanda yaşayan öz mağaza müdirim Xəlilov Xalıq Əsəd oğlunun mənzilində oldum. Bir neçə dəqiqə keçdikdən sonra mən gördüm ki, divarda Stalinin böyük portreti asılıb. Onda mən Xəlilova sual verdim ki, Stalinin portretini nə üçün çıxarmır. Bizdən başqa Xəlilovun oğlu və həyat yoldaşı da evdə idi. Xəlilovun cavabı belə oldu:
SSRİ-də Stalin yeganə kişi idi, onu Xruşşov ləkələdi. Zaman gələcək, görərsən və mənim sözlərimi xatırlayarsan, Xruşşov və onun dostu Mikoyanın ikisini də güllələyəcəklər. Örnək olaraq götürün 1936-cı ildə güllələnmiş Yejov, Blyuxer, Tuxaçevski, Vəzirov, Rəhmanov,
Əfəndiyevi; tədricən növbə onlara da çatacaq. Molotov SSRİ-də natiq idi, Jukov Berlini almışdı və digərləri, Xruşşov onlarla bağlı nə etdi? Bax görəcəksən, mən ölü olum, sən diri, xatırlayarsan mənim sözlərimi və deyərsən ki, rəhmətlik Xəlilov düz deyirmiş. Bir fikirləş – Molotov, Voroşilov, Malenkov, Jukov, Bağırov, Beriya və digərləri, onlar həqiqətən köhnə bolşeviklər idi, onları Xruşşov ləkələdi, nə üçün bəs Mikoyana toxunmadı, ona görə ki, Xruşşov Mikoyanla əlbir olub yoldaş Stalini zəhərləmişdi, buna görə Xruşşov Mikoyana toxunmadı, onları Stalinin ölümü bir-birinə bağlayır.
Yoldaş Xruşşov, təxminən 40-41 il Sov. İKP üzvü olan Xəlilovun hərəkətləri mənim üçün təəccüblüdür, nə üçün bunlar haqqında belə danışır. Mən həmin dəqiqə Dövlət Təhlükəsizliyi Komitəsinin sədrinə teleqram göndərdim ki, Sizdən cavab gələnə qədər Stalinin portreti ilə bağlı Xəlilovun mənzilini yoxlayıb partiya və hökumətin göstərişlərinin niyə yerinə yetirilməməsini aydınlaşdırsın”. (Bax: Bakı sakini Nazim Xankişiyevin Nikita Xruşşova məktubu. 22 iyun 1962-ci il. Azərbaycan Respublikası Prezidentinin İşlər İdarəsinin Siyasi Sənədlər Arxivi və ya Cəmil Həsənli. Azərbaycanda Sovet liberalizmi: Hakimiyyət. Ziyalılar. Xalq. (1959-1969). Bakı, QANUN nəşriyyatı, 2018, s.137-138; Джамиль Гасанлы. Советский Азербайджан: От оттепели к заморозкам (1959–1969). Москва, РОССПЭН, 2020, с.131.)
Təəssüf ki, XXII qurultaydan 60 il keçməsinə baxmayaraq bu gün də Rusiyada və onun yedəyində gedən Azərbaycanda Stalinizm ideya istiqaməti olaraq davam edir.