AXCP sədri Əli Kərimli
Euronewes tv-də Əfqanıstanın keçmiş Rabitə naziri haqda reportaj verirlər. Keçmiş Rabitə naziri hazırda Almaniyaya sığınıb. Velosipedlə evlərə pizza çatdırır. Keçmiş nazir savadlı adamdır. Ancaq alman dilini bilmədiyi üçün öz ixtisası üzrə işləyə bilmir. Jurnalistə deyir ki, mən ömrümün axırına qədər pizza satmağa hazırlaşmıram. Pizza satmaqla pul yığıb, alman dili kursuna gedəcəm. Dili öyrəndikdən sonra kommunikasiya şirkətlərində özümə iş tapacam.
Bu hadisəni sizə nəyə görə yazıram? Əfqanıstanın keçmiş hökumətini dünya korrupsioner hökumət kimi tanıyır. Ancaq hətta orada belə dil kursuna verəcək qədər pulu olmayan nazirlər olub. İndi də qayıdaq öz başıbəlalı Vətənimizə. Analoqsuz idarə olunan ölkəmizə. İlham Əliyevin hökumətində siz bir nəfər nazir, hətta icra başçısı tanıyırsınızmı ki, vəzifədən gedəndən sonra pizza satmağa ehtiyacı olsun demirəm, milyonları olmamış olsun? Azərbaycandakı korrupsiya heç bir ölkədəkinə bənzəməz. Çünki Azərbaycandakı korrupsiya ayrı-ayrı adamların səhvi acgözlüyü deyil, dövlət idarəetməsinin hakim prinspidir. Korrupsiya prosesinin bir parçası olmadan vəzifədə qala bilməzsən.
Kaş ki, xalqımız uşaq pulundan məhrum edilməsinin, pensiya və müavinət ala bilməməsinin, kütləvi işsizlik və yoxsulluğun məhz analoqsuz korrupsiyanın, ölkəni idarə edənlərin dibsiz nəfsinin, xroniki acgözlüyünün nəticəsi olduğunu hamılıqla bilə, korrupsionerləri də, onlara yaltaqlananları da həyatından silməyi bacara.