ADR sədri, iqtisadçı alim Qubad İbadoğlu
Şuşanın əhalinin sayı 34,594, ərazisi 310 kv.km-dir. Şuşa rayonu 1 şəhər, 1 qəsəbə (Turşsu) və 37 kənddən ibarətdir. Hazırda Şuşa şəhəri və Daşaltı kəndinə nəzarət imkanımız vardır. Yerdə qalan 1 qəsəbə və 36 kənd rus-erməni hərbi birləşmələrinin sərəncamındadır.
Dünən açıqlanan məlumata görə, Şuşada ümumi sahəsi 46.765 kvadratmetr olacaq, avqustun 29-da təməli qoyulan yeni yaşayış massivi 6 məhəllədən ibarət olacaq. Məhəllələr üzrə əhali sayı 2020 nəfər nəzərdə tutulur. Beləliklə, yaşayış massivində 25 binanın olacağı və 12 min nəfər əhalinin məskunlaşması planlaşdırılır.
Şuşa şəhərində hazırda hotellərin və restoranların tikilməsi onu göstərir ki, hakimiyyət biznes maraqlarına üstünlük verir. Bu yolverilməzdir. Şuşa ilk növbədə Şuşalılarındır. Şuşada abadlaşdırma və məskunlaşma qərarları onlarla razılaşdırılmalı, bərpa və tikinti işləri Şuşalıların rəyi nəzərə alınmaqla həyata keçirilməlidir.
Şuşalılar mənə yazırlar, səsli mesaj göndərib soruşurlar ki, belə olanda yerdə qalan 22,5 min Şuşa rayon sakinləri harda yaşayacaq. Onların narahatlığını bölüşür və ictimailəşdirmək istəyirəm.
Eyni zamanda bildirmək istəyirəm ki, bu gün Şuşalıların narazılığını eşitməyən, onların narahatlığını bölüşməyən hakimiyyət sabah eyni ədalətsiz yanaşma ilə işğaldan azad olmuş digər rayonların sakinlərinin mülkiyyət hüquqlarını pozacaq. Odur ki, məcburi köçkünlər hakimiyyətdən haqlarını tələb etməlidir, yoxsa onları da Şuşalıların aqibəti gözləyir. Susmayın, paylaşın və haqq səsininizi ucaldın!