İlham Hüseyn
Əlbəttə, vaksinasiya prosesi könüllü olmalıdır. İnsanların hüquqlarını tapdaq etmək yolverilməzdir. Amma özünü “böyük siyasətçi” kimi cəmiyyətə dürtüşdürüb, həm də vaksin əleyhinə təbliğat aparmaq namərdlikdi. Tibbin inkişaf etdiyi ABŞ, İsrail, İngiltərə, Almaniya və digər ölkələr bəyan edirlər ki, başqa çıxış yolu yoxdur. Dünyada 5 milyard insan vaksinasiya olunub. Digər tərəfdən statistika göstərir ki, iki doza vaksin olunmuş şəxslər arasında ölüm halları yox səviyyəsindədir. Dünyanın heç bir ölkəsində, heç bir ciddi təşkilat, qurum, tanınmış şəxs vaksin əleyhinə təbliğat aparmır. Anti-vaksin təbliğatı əsasən Rusiya və Azərbaycanda geniş vüsət alıb və bunun da bəlli səbəbləri var.
Məsələn, Azərbaycan vətəndaşı bu illər ərzində o qədər yalan eşidib ki, hökumətin həqiqi çağırışına da inanmır. Hamı əmindir ki, hökumət xalqın xeyirinə hər hansı addım atmaz. Amma indiki situasiyada vəziyyət fərqlidir. Əvvəla, bu qlobal bir prosesdi, Azərbaycan hökumətinin tapıntısı deyil. İkincisi, vaksinlər Prezident Aparatında hazırlanmır. Yəni, virusun peyda olması da, anti-virus da YAP hökumətinin töhfəsi deyil.
Amma hökumətin karantindən sui-istifadə etməsi, fürsətdən yararlanıb vətəndaşın cibinə girməsi, ən çətin anlarda vətəndaşı özbaşına buraxması faktdır və bu, vətəndaşla düşmənçilikdi..
Yeri gəlmişkən, AXCP sədri Əli Kərimli vaksinasiya çağırışı edəndə cəmiyyətin vaksinasiyaya qarşı olduğunu bilirdi. Yəni, cəmiyyətin hökumətə etimadsızlığına görə, hökumətin vaksinasiya çağırşının aqressiv qarşılandığından xəbərdar idi. Amma Əli bəy vətəndaşın sağlamlığını əsas götürdü, hətta onu qınayanların olacağını bildiyi halda belə bir çağırış etdi. Bir sözlə, vaksinasiya əleyhinə hamımız danışa bilərik, bunu mənasız iş hesab edə bilərik. Amma anti-təbliğatımızın heç bir elmi əsası yoxdur. Vaksinin leyhinə isə statistika, elmi əsaslandırma var. Bütün dünyada sağçı, solçu, iqtidar, müxalifət, hər kəs peyvəndə səsləyir.
Bir daha təkrar edirəm ki, məcburiyyətin əleyhinəyəm. Amma heç bir ciddi arqument olmadan anti-vaksin təbliğatı aparmağı da zərərli hesab edirəm.
Bu məsələdən sui-istifadə edib, Əli Kərimlini hədəf seçmiş “müxalifət liderləri” isə koronavirusdan da təhlükəli məxluqlardı. Əgər Əli Kərimli anti-vaksin təbliğatı aparsaydı, bu siyasi tullantılar onu “vətən xaini” elan etmişdilər. Əli Kərimlinin “vaksin olunun” çağırışı hökumətlə həmrəylik deyil, elmlə, dünya tibbiylə, dünyanın ağıllı adamlarıyla və vətəndaşın sağlamlığıyla həmrəylikdi.