AXCP Rəyasət Heyətinin üzvü Fuad Qəhrəmanlı
Fərhad Köçərin “Gidəməm” mahnısını dinləməyən yoxdur yəqin ki. “Acıdan keçməyən şarkı bir az əskikdir” deyilir mahnın sözlərində. Çünki, acı ilə yoğrulub xəmirimiz zatən.
İNSAN olmağın acısı əzabların ən üstünüdür, alisidir. Bu bilməyin, duymağın doğurduğu iztirablar, dünyanı anlamağın yaşatdığı məşəqqətlər, həyatın tragik tamaşaları qarşısında seyrçi kimi köks ötürməyin təəssüf acılarıdır.
Ona görə də, xoşbəxtlik nə var-dövlətdə, nə də arzulara qovuşmaqadır. Nə qədər paradoksal görünsə də, əsil xoşbəxtlik cahillik bataqlığında qərq olub, dünyanı özündən və şəxsi ehtiyaclarından ibarət, bir mənin dar hüdudlarına sığışmış şəkildə, elə özün boyda görməkdədir.
Bundan qaçanlar üçün xoşbəxtlik arayışı məhşur yunan əfsanəsində olduğu kimi Sizif əməyinə məhkum olmağa bənzəyir.
O üzdən filimlərdə, musiqilərdə, hadisələrdə acıya, duyğulanmağa tələbat, ehtiyac duyuruq, çünki bu acı ilə insan olduğumuzun fərqinə varırıq, içimizdəki atəşin nurunu onunla üzə çıxarıb şölələndirə bilirik. İşıqlı insanlar hər zaman qayğılı, kədərli olur bu üzdən.
Acının öz dili , öz sehri var. İçimizdəki ürək yanğısı bizi insanlara, insanları da bizə yaxınlaşdırır, bir ananın övladları tək doğmalaşdırır. Bizlər acı ilə bütünləşə bilirik, həmdəm ola, acılı günlərin həmrəyliyi ilə bir – birimizə güvən qazana bilirik.
Mahnıda “acının insana qatdığı dəyər” deyilir. Acını duymayan, kədəri hiss etməyən, göz yaşları susuz çeşmə kimi qurumuş, dənizdəki dalğanın möhtəşəm əzəmətini sürünən ləpələrdən fərqləndirə bilməyən, hər gün ölən insanlığın tabutu altına bir kərə də olsa çiynini verməyən, beyni var ikən qəlbə ehtiyac hiss etməyən, ruhunun tərk etdiyi adamlar var ya… Onlar nə anlarlar insan olmaqdan.
Nə sevə bilərlər, nə sevilməyi haqq edərlər, nə də bu dünyanı sevgi dilindən anlayıb, acılarla süslənmiş mənəvi gözəlliklərdən duyarlar…
Onların acı adına anlayacaqları ancaq problemlər ola bilər. Mahnıda acının insana qatdığı dəyər deyimi, əslində dünyanın dəyəridir. Bu dəyərə isə yol insanın öz içindəki labirintlərdən keçib gedir. Dünyanın mənəvi dəyərini isə, öz dünyasını tapanlar bilər ancaq. Nəsimi ona görə “Məndə sığar iki cahan” deyirdi ki, insan dünyasının böyüküyü bu dünyanı öz içinə sığışdırmaqdan daha böyükdür.
Sevinc sadədir, bəsitdir, dayazdır, anidir, heç bir fədakarlıq tələb etmir, bu üzdəndir ki, insanı içinə, dərinliklərə deyil, ətrafa, cəmiyyətə yönəldir, təntənələrlə, alqışlarla rituallaşır. O üzdəndir ki, insanların sevincləri bir birindən elə də fərqlənmir, mənəvi yetkinlik, ruhi kamilliyə gərək duymur. Acı, kədər isə duyğuların çeşidliliyi, əzabın qatları, insanı həyatın dibinə götürən yolun uzunluğu, dünyada təskinlik tapa bilməyən ruhun bilinməz, sirli ilahi aləmə nüfuz etməsi ilə daha zəngindir, rənglər qədər çox çalarlıdır. Bu səbəbdəndir ki, acı, iztirab insanı öz içinə çəkir, öz zənginliyi ilə iç dünyasını ona sevdirir, bu dünyanın gerçək sahibinə çevirir. Bu dünyadan bixəbərər nadanlar isə zahiri dünyanın əsiri, görməmişi olurlar.
Acı ilə çulğalaşmış təkliyin fəlsəfəsi də məhz insanın yeraltı dünyasının bu laylarında yatır. Öz acılarınla öz içinə baş vurub, hamının görüb tanıdığı özünü hamıdan fərqli bir şəkildə duymaq, bir səyyah, dənizçi kimi açıq dənizə yelkən açıb kimsənin bilmədiyi, tanımadığı bir dünyanı özün üçün kəşf etmək.
“Kimsədən getməm gedəməm” deyir mahnının sözlərində. Dünyanın acısını duymağı bacaran, ürəklərin sızıltısını hiss edən, baxışların kədərini sezən, puç olmuş arzuların həsrətini görən, boşa çıxmış ümidlərin nisgilindən anlayan bir insan istəsə belə, onu hörümçək ağı kimi sarmış bu iztirab, əzab, acı torundan qurtulub gedə bilməz. Çünki duyduğu acı ilə kimsənin ağrısına, əzabına, acısına üz çevirə bilməz, kimsəni öz halına buraxıb görməzdən-duymazdan gələ bilməz. Bu üzdən də “kimsədən gedəməm, getməm” deyilir bu musiqinin sözlərində…
Dünyanın tərəqqisi, insanlığın yüksəlişi həmişə acıları qoyub getməklə yox, onları arayıb görüb üstünə getməklə, insanlığın dərdinə, ağrısına çarə axtarmaqla olub. Bu üzdən acılar bizə birər dərman kimi…..
Dinləyin siz də…