İctimai fəal Bəxtiyar Hacıyev
Azərbaycanda bir çox cinayətlərin, qətl, zorakılıq, intihar, xuliqanlıq və s. kökündə hüquq-mühafizə orqanlarının və məhkəmələrin öz işlərini görməməsi dayanır. Sevinc Məhərrəmova işi bunun bir nümunəsidir. Əri döyüb bədənini gömgöy etmişdi, öldürməklə hədələyirdi, hüquq-mühafizə orqanları həyatı təhlükədə olan qadını get-gələ salmışdı, gündə bir bəhanə ilə uzadırdılar, axırda da bir ailədə ana qəbrə, ata həbsxanaya getdi və iki uşaq valideynsiz qaldı.
Sevinc Məhərrəmova işi tək iş deyil. Hər gün onlarla insan hüquq-mühafizə orqanlarına potensial cinayətlərlə bağlı məlumat verir.
Vətəndaş “özümü öldürəcəm” deyir, polis “öldürən deməz, edər” deyir.
Vətəndaş “məni boğaza yığıblar, gedib başını kəsəcəm” deyir, prokuror “ağıllı adamsan, elə şey etməzsən” deyir.
Vətəndaş “məni öldürməklə hədələyirlər” deyir, hakim “əşi hər hədəni ciddi qəbul etmə” deyir.
Nəticədə onların ləng, məsuliyyətsiz, qanunlara zidd və səmərəsiz işinə görə biri intihar həddinə çatır, intihar edir. Digəri başqalarının təzyiqlərinə dözmür, gedib kimisə bıçaqlayır, başqa biri onu təhqir edənin başını kəsir, birinə qarşı edilən təhdid reallaşdırılır.
Həmin anda hüquq-mühafizə orqanları, məhkəmələr işə düşür, operativ şəkildə başlayırlar ki, filankəs cinayət törədib, həbs edilməlidir. Bəs o cinayətin törədilməsinə qədər gətirib çıxaran səbəblərə niyə göz yumursunuz, niyə əsl cinayətkarları qoruyaraq sizə müraciət edən vətəndaşdan cinayətkar çıxarmağınızın məsuliyyətini anlamırsınız?
Sizə müraciət gəlir, açın, Cinayət Məcəlləsinə baxın, cinayət varsa, işinizi görün, “əşi barışarsız”, “yola ver”, “səbr elə”, “ağıllı adamsan, sən elə şey eləməzsən” və s. kimi şeylər qanunda yoxdur axı.