Hüquq müdafiəçisi Rüfət Səfərov
Bu hakimiyyətə, onu idarə edənlərə, rəhbərindən tutmuş məmurlarına, xüsusilə, rəsmi hüquq siyasətinə dair mövqeyim hər kəsə bəllidir.
Təkrar etməyimdə faydasızlıq yoxdur: dərin inama sahibəm ki, Azərbaycanda siyasi, hüquqi, iqtisadi idarəetmənin bütün qolları saxta, ədalətsiz, haram seçkilərə, dəyənəyə, zorakılığa, monopoliyaya, gizliliyə, tayfabazlığa, qohumbazlığa, aşağı rütbəlilərin yüksək ranqlıların önündə qul mütiliyinə, şəxsiyyətsizliyinə, milli malın bir dəstə qanunazidd tərəfindən hər gün oğurlanması nədir, birbaşa soyulmasına, uzağı 50 min hüquqaziddin ən lüks həyat tərzinə, yerdə qalan bütöv xalqın-hüquqsuzun çətinlik, məşəqqət və məhrumiyyətlərlə dolu gününə əsaslanır.
Diqqət etdinizsə, əvvəlki mürəkkəb cümlədə aşağı rütbəlilərin yüksək ranqlıların önündə qul mütiliyinə, şəxsiyyətsizliyinə toxundum ki, bu da digər qeydlərim kimi əsla təsadüfi deyildir. Uzun illərdən bəridir ki, davam edən sərt üsul-idarədə gəlmiş-getmiş vəzifəli şəxslərin 3-5-indən savayı bütün məmur korpusu- nazir və komitə sədrlərindən tutmuş ta Təhlükəsizlik Şurasının üzvlərinədək (heç şübhəsiz, bir nəfəri çıxmaq şərtilə) rəhbərin önündə daim reverans ediblər, qul, itaətkar, müti olublar, davranış və hərəkətlərində şəxsiyyətlərinin tamı yox, şəxsiyyətsizliklərinin dağınıqlığı diqqət cəlb edib.
Təbii, cüzi istisnalar olub ki, onlardan biri də keçmiş Baş prokuror və səfir Eldar Həsənovdur.
Eldar müəllim yüksək savadı, hüquqi düşüncəsi, natiqliyi, ən əsası təşəbbüskarlığı ilə fərqlənib, idarəçilikdə çoxlarından fərqli olaraq odioz obrazı ilə seçilməyib, yüksək və olduqca məsuliyyətli postlarda təmsil olunmasına baxmayaraq, hərəkət və hərəkətsizlikləri ilə cəmiyyətin nifrətini qazanmayıb, rəhbərlə açıq görüşlərində özünü sərbəst ifadə edib, müşavirələrdə parlaq və yaddaqalan nitqlər söyləyib, nəhayət, ictimai-siyasi xadimlərlə, ziyalılarla, qələm adamları ilə, məxləs, cəmiyyətin qaymağı sayılan insanlarla ehtirama dayanan münasibətlər qurmağı bacarıb.
İndi buradək oxuyan dostlar deyəcək ki, “Rüfət, elə təqdim etdin ki, sanki sosial şəbəkələr və cəmiyyət Eldar Həsənovu tanımır… Sən elə bil ki, heç kimin bilmədiyi yeni sima təqdim edirsən, üstəlik, onu aydan arı, sudan duru, təmizlik və vicdan mücəssəməsi qismində göstərirsən…”
Əsla bu fikirdə deyiləm.
Eldar Həsənov Baş prokuror kimi fəaliyyət göstərdiyi dövrdə prokurorluq orqanlarının, hüquq mühafizə strukturlarının fəaliyyətində qanun və hüquqla bir araya gəlməyən meyllər olub, siyasi yüklü cinayət təqibləri realizə edilib, normativ-hüquqi aktların, xüsusilə, cinayət və cinayət-prosessual məcəllələrin tələbləri bir çox hallarda gözlənilməyib, lakin xələfi Qaralov səviyyəsində olmadığı üçün 5 ildən sonra kənarlaşdırılıb.
O, bir müddət sonra ayrı-ayrı xarici ölkələrdə Azərbaycanı rəsmi surətdə təmsil edib.
Cibinin pulu ilə heykəllər və parklar inşa etdirib…
Və günün birində qələmi çilik-çilik edilib.
Absurd, inanmadığım ittihamlara məruz qalıb, dörd divar arasında sağlamlığını itirib, Avropa İnsan Haqları Məhkəməsinin müvafiq qərarından sonra lazımi səhiyyə xidmətləri göstərilib, cərrahi əməliyyat baş tutub və təxirəsalınmaz surətdə müalicə müəssisəsindən kameraya qaytarılıb.
Məhkəməyə əsa ilə çıxıb.
Qəsdən adam öldürmədə ittiham olunan Rövşən Əkbərovdan fərqli olaraq şüşəli qəfəsə salınıb.
Növbəti məhkəmə iclasında haqlı olaraq vəsatət təmin edilib: təqsirləndirilən şəxs Həsənov müdafiəçilərinin yanında qərar tutub.
Qəribədir ki, o, məhkəmə iclasının qapalı keçirilməsini tələb edib və deyib: “Xahiş edirəm, mənim səhhətimlə bağlı danışanda diqqətli olun, heç kim bilmir ki, başına nə gələcək. Əgər sağ qalsam, mübarizəmi sona qədər aparacam. Ölsəm, nəslimdə 61 hüquqşünas var, onlardan ən azı biri qeyrətli çıxıb, mənim hüquqlarımı müdafiə edəcək. Bunu vəsiyyətimdə də yazmışam…”
Beləliklə:
Eldar müəllim, özünüz, sizi qandallayanlar və biz bilirik ki, hazırkı cinayət işi üzrə irəli sürülən ittihamlar obyektiv deyil, əsassız və ədalətsizdir. Baş prokuror kimi fəaliyyət göstərdiyiniz dövrə bağlı hansısa xüsusatlar üzrə cinayət işi qaldırılsaydı, sizə ittiham irəli sürülsəydi, inanardım, müdafiə etməzdim, çünki olub. Olsa da belə, CM-nin 75-ci maddəsi müddətin keçməsi ilə bağlı cinayət məsuliyyətindən azad etməni nəzərdə tutur. Artıq 21 idən çoxdur ki, Baş prokuror deyilsiniz və qeyd edilən maddə üzrə son hədd 20 ildir-xüsusilə ağır cinayətlər üzrə.
Belə olan halda niyə belə acizlik və qorxaqlıq nümayiş etdirirsiniz?
Nədən mübarizəçün ölümü gözləyirsiniz?
“Əgər sağ qalsam, mübarizəni sona qədər aparacam” deyirsiniz, amma sizin qollarınızı qandallayan şəxsdən imdad diləyirsiniz, az qala yalvarırsınız.
Bu, məhz Sizə qəti yaraşmır.
Üstəlik, hamı, o cümlədən, Siz əminsiniz ki, barənizdə ağır ittiham hökmü çıxarılacaqdır, bəlli anlamda ümid yoxdur.
O zaman nədən açıq surətdə sözünüzü demirsiniz, bu hökumətin mahiyyətini, xüsusilə, hüquqi sifətini ifşa etmirsiniz, XALQA xidmət göstərmirsiniz?
Cənab Baş prokuror Eldar Həsənov, hazırkı halınızı Allahın böyük lütfü kimi dəyərləndirin, bu durumda rejimin önündə deyil, böyük həqiqətlərin və əzilən XALQIN qarşısında əyilin. Bunu Sizə həmin yolu keçən və uğur qazanan bir əyalət müstəntiqi söyləyir-oğlunuz yaşında olan hüquqçu!
Son dərəcə xahiş edirəm, ibtidai istintaq zamanı rəhbərə etdiyiniz yüngülvarı yaltaqlığı, aman diləməyi kameranın küncündəki zibil qutusuna tulazlayın.
Tarixdə yazıq hüquqşünas kimi yox, kükrəyən hüquqçu kimi qalın!
Qohumlarınıza, 61 hüquqçu əzizinizə, dostlarınıza, nəhayət, süfrənizin qırıntıları ilə böyüyüb, “adam” olanlara bel bağlamayın, yalnız cəmiyyətə güvənin!
Hansı biri bu gün Sizi açıq və sistemli müdafiə edir?
Etməzlər!
Çünki formalaşmasında müstəsna rol oynadığınız sistemin doğurduğu qorxu mühitinin təsiri altında dovşan kimi əzilirlər, cınqırlarını belə çıxara bilmirlər.
Cənab Baş prokuror, “onsuz da hamımız öləcəyik” prinsipinə söykənib, savaş verin, qorxmayın, xalq və vicdanlı adamlar sizə layiq olduğunuzdan da artıq sahib çıxacaq-əminəm.
Vacib qeyd: Eldar Həsənov bu sətirlərin müəllifinin atasına qarşı zamanında ciddi pisliklər edib, münasibətlər düşmənçilik səviyyəsində olub, davam edir və adım qədər əminəm ki, günah Həsənovda olub.