AXCP sədri Əli Kərimli
Əziz həmvətənlər, sizcə, biz toplum olaraq namus məhbusu Əlizamin Salayevə haqq etdiyi dəstəyi veririkmi? AXCP fəalı Əlizamin bəy bir el qızını harın polisdən qorumağa çalışdığı üçün şərlənib, həbs edilib. Cəzaçəkmə müəssisəsində də hökumətin təbirincə desək, dinc oturmayıb. Digər məhbuslara qarşı yol verilən qanunsuzluqları ictimailəşdirib, onların hüquqlarını qoruyub. Üstəlik, ona təklif olunan hansısa sənədi imzalamayıb. Məhbusdan hansı sənədin imzalanması tələb oluna bilər? Məntiqlə Əlizamin bəyi ya öz aləmlərində əməkdaşlığa cəlb etmək, ya da əfv ərizəsi yazmağa məcbur etmək istəyiblər. Əlizamin bəy imtina etdiyi üçün cərimə kamerasına (karsa) salınıb. Hətta Əlizamin bəyə işgəncə verilməsi haqda da məlumatlar var. Belədir, Azərbaycan hakimiyyəti. Vətən, millət sevgisi olan insanları sevməz, hey çalışar ki, ölkədəki qürurlu insanların qürurunu sındırsın, əzsin.
İndisə qayıdıram yazının əvvəlindəki suala. Əlizamin bəy gerçəkdən də çox fədakar insandır. Xalqımızın hüquqlarını hökumətdən uca səslə tələb etdiyi, müxtəlif etiraz aksiyalarının təşkilində iştirak etdiyi üçün dəfələrlə həbs olunub, ağır işgəncələrə məruz qalıb, ancaq mübarizəsindən, yolundan dönməyib. Sonra rayonlarından olan bir arxasız qadının alçaldılmasına dözmədiyi üçün uzun müddətə azadlıqdan məhrum edilib. Həbsxanada da özü məhbus ola-ola tanımadığı insanların – soydaşlarının haqqını tələb edib. Bir insan daha nə qədər fədakarlıq etsin? Bəs biz necə, heç olmasa sosial şəbəkələrdə hazırda köməksiz vəziyyətdə olan bu cəsur soydaşımıza haqq etdiyi dəstəyi veririkmi?