İctimai fəal Bəxtiyar Hacıyev
Ramin Bayramlının istefasından sonra TƏBİB-i ləğv etsələr, təəccüblənmərik. İlk dəfə deyil ki, hansısa böhran zamanı islahat adı ilə bir qurum yaradıb, kimisə günahkar çıxarıb, sonra ləğv edirlər. Devalvasiyadan sonra Maliyyə Bazarlarına Nəzarət Palatası yaratdılar, bir müddət sonra Rüfət Aslanlını mətbuatda əsas günahkar kimi göstərib, vəzifədən çıxarıb, Palatanı bağladılar.
Müdafiə Sənayesi Nazirliyi yaratdılar, Yavər Camalovu nazir təyin etdilər. Nazir vəzifədə dünyasını dəyişdi, nazirliyi ləğv edib, “Azərsilah” ASC yaratdılar. Sonra Mədət Quliyevi DTX rəisi postundan çıxardılar, ona vəzifə vermək üçün cəmi 5 ay sonra “Azərsilah”ı yenidən Müdafiə Sənayesi Nazirliyinə çevirdilər.
Onlarla belə qurum yaratdılar, ləğv etdilər, ayırdılar, birləşdirdilər. Misalları çox çəkmək olar.
Hamısında da yaradılanda da, ləğv ediləndə də bəlağətli cümlələrlə bəzədilər. Qarşıya qoyulan məqsədlərə çatdılarmı?
TƏBİB: “ölkədə tibbi xidmətlərin keyfiyyətini daha da yaxşılaşdırmaq və müasir tələblərə uyğunlaşdırmaq, habelə bu sahənin mövcud maliyyələşmə mexanizmlərini yeni iqtisadi əsaslarla tətbiq etmək yolu ilə əhaliyə göstərilən tibbi xidmətlərin səviyyəsinin artırılmasına nail olmaq, tibbi yardımın keyfiyyətinə, pasiyentlərin hüquqlarının qorunmasına nəzarət mexanizmlərini təkmilləşdirmək və əhalinin sağlamlığının etibarlı qorunmasını təmin etmək…”
Maliyyə Bazarlarına Nəzarət Palatası: “Ölkənin maliyyə sisteminin daha da sabit və dayanıqlı, rəqabətqabiliyyətliliyinin isə daha yüksək olması üçün maliyyə bazarlarının fəaliyyətinin səmərəli şəkildə təmin olunması, eləcə də kreditorların, investorların və sığorta olunanların hüquqlarının qorunması tələb olunur.
Azərbaycan Respublikasının maliyyə sektorunun dayanıqlılığını təmin etmək və bu sahədə nəzarət mexanizmlərini təkmilləşdirmək …”
“Azərsilah” ASC: “qeyri-neft sektorunun inkişafı, iqtisadiyyatın ixrac qabiliyyətinin, eləcə də rəqabətqabiliyyətli, idxalı əvəz edən sənaye məhsullarının istehsalının artırılması, eyni zamanda, ölkənin müdafiə siyasətinin başlıca istiqamətlərindən olan müdafiə sənayesinin müasir tələblərə uyğunlaşdırılması və ordunun hərbi-texniki təchizatında kəmiyyət və keyfiyyət göstəricilərinin daxili istehsal hesabına yüksəldilməsi bu sahədə fəaliyyət göstərən yüksək inkişaf potensialına malik müəssisələrin qabaqcıl təcrübə və texnologiyalar əsasında modernləşdirilməsinin həyata keçirilməsini, qabaqcıl korporativ idarəetmə təcrübəsi tətbiq edilməklə, mövcud iqtisadi konyunkturada rəqabətədavamlılığının artırılması”