AXCP sədri Əli Kərimli
Rejimdən daha bir biabırçı hərəkət. Xalqın milyardlarını oğurlamış korrupsioner rejim siyasi rəqiblərini çörəklə imtahana çəkir. Hüquq barədə 14 kitabın, xeyli qanun və məcəllənin müəllifi, ölkədə minlərlə hüquqşünasın müəllimi olmuş ədliyyə generalı Vidadi Mirkamal siyasi əqidəsinə görə qanuni pensiyasından məhrum edilir.
Vidadi Müəllim Milli Şura Koordinasiya Mərkəzinin üzvüdür. Rejimlə mübarizənin önündə olan şəxsiyyətlərdəndir. Rejim Vidadi müəllimi Milli Şuradan ayırmaqdan ötrü övladlarını işdən çıxarmaqdan tutmuş mənəvi terrora qədər ən iyrənc yollara baş vurub. Ancaq tanınmış ziyalımız həm də cəsarətli bir şəxsiyyət olduğundan təzyiq və şantajlardan qorxmayıb. Milli Şurada əqidə dostları ilə birlikdə apardığı haqq mübarizəsindən bir addım da geri qoymayıb. Rejim də cavab olaraq Vidadi müəllimə qarşı repressiyasını gücləndirib. Vidadi müəllim Ali Arbitraj Məhkəməsinin (sonralar İnzibati Məhkəmə adlandırıldı) sədr müavini işləyib. Ədliyyə generalıdır. İndi onu qanuni yolla aldığı pensiyasının əhəmiyyətli hissəsindən məhrum edirlər. Üstəlik, indiyə qədər aldığı 103 min manat pensiyanı ondan geri tələb edirlər, əmlakını siyahıya alırlar.
Heç bir şübhə yoxdur ki, Vidadi müəllimə qarşı təzyiq də rejimin Milli Şura və AXCP-yə qarşı repressiya aktlarının növbəti həlqəsidir. Biz rejimin Milli Şura sədri Cəmil Həsənli ilə necə düşməncəsinə davrandığnı gördük. Biz rejimin MŞ Koordunasiya Mərkəzinin üzvləri Gözəl Bayramlı və İbrahim İbrahimlini prinspial mübarizələrinə görə “təbiiyə bənzər” şəkildə məhv etməsini, Oqtay Gülalıyevi ölümün bir addımlığına gətirməsini unutmadıq. MŞ üzvü, tanınmış hüquq müdafiəçisi Leyla Yunusun haqsiz yerə həbs edilib, həbsdə ağır işgəncələrə məruz qoyulması da yadımızdan çıxmayıb. Biz hamımız şahidik ki, MŞ KM üzvü Tofiq Yaqublu məhz MŞ-dakı cəsur fəaliyyətinə görə şərlənib həbs olundu, ağır işgəncələrə məruz qaldı. Biz bilirik ki, MŞ KM üzvü Gültəkin Hacıbəyli məhz MŞ-dakı prinspial mübarizəsinə görə çoxsaylı təzyiqlərə məruz qaldı, rejim əsassız şəkildə ona 91 min manat cərimə ödətdirdi. Biz yaxşı xatırlayırıq ki, MŞ KM üzvlərindən Turan informasiya agentliyinin direktoru Mehman Əliyev şərlənərək həbs olundu (beynəlxalq təzyiq nəticəsində tezliklə azad edilsə də), Nurəddin Mustafayevin 3 övladı bir gündə hüquq mühafizə orqanlarındakı işlərindən xaric edildi, Rahim Hacıyev və Şahvələd Çobanoğlu barəsində qondarma cinayət işi açıldı.
AXCP-nin təkcə Rəyasət Heyəti üzvlərindən 10 nəfər son illərdə uzunmüddətli siyasi məhbus həyatı yaşayıb. Həbsxanalardan keçmiş AXCP üzvlərinin sayı yüzlərlə, bu mübarizədə işini itirmiş cəbhəçilərin sayı minlərlə hesablanır. Vidadi müəllimə qarşı repressiya aktı da bu repressiyaların davamıdır. Milli Şuraya zərbə vurmaqdır. Xalqımız onun tələblərini uca səslə səsləndirməsinin, təşkil etdiyi mitinqlərin, haqq mübarizəsinin Milli Şura və AXCP-yə neçəyə, nələrə, hansı məhrumiyyətlərə başa gəldiyini bilməli və unutmamalıdır.
Xalqımız onun haqq mübarizəsinin önündə gedən mübariz insanları dəstəkləməyi, onlara arxa durmağı bacarmalıdır ki, özü də müdafiəsiz və arxasız qalmasın.