Milli Şuranın Koordinasiya Mərkəzinin üzvü Rafiq Manaflı
Mənə elə gəlir ki, İlham Əliyev dərin bir depressiyadadır. “Mən hər şeyi bilirəm” iddiasının sonucu, “mən heç nə bilmirəmmiş” nəticəsi onu karıxdırıb, nə dediyinin, nə etdiyinin fərqində deyil.
İki nəfər boğazacan rüşvətə bulaşmış, korrupsiyanın içində olan adamları Cəlilabad, Şəmkir kimi rayonlara icra başçısı təyin edir, göndərəndə “görün korrupsiya olmasaydı büdcəmiz nə qədər olardı” deyir. İcra başçıları korrupsioner deyillər ki, onlar oğrudurlar. Sənin dövləti korrupsiyanın qırıntılarından nə qapdılar, qapdılar.
Sosial siyasətin anasını ağladıb, yüz minlərlə insanın pensiyasını, müavinətini, yardımını kəsib büdcədə profisit yaradır və elə həmin pensiyasız, müavinətsiz, yardımsız qalmış insanların gözünün içinə baxa-baxa “həmin pullar sosial siyasətə yönəldilir” deyir. Yahu bu sosial siyasətin nə olduğunu doğurdanmı bilmir?
3000 gənc balalarımızın qanı bahasına qazanılmış böyük hərbi uğurları siyasi küləklərə, yelə verib uçuzdurur, uf da demir. İşğalçı rus ordusunu torpağımıza soxması azlıq edir, üstəlik elə həmin ordunun qətlə yetirdiyi şəhidlərimizin məzarlığında onların bayraqlarını ucaltdırıb ruhumuza həqarət edir. Təəccüblü də deyil, Şaumyana heykəl ucaldan atanın balasıdır. Bu gün həmin işğalçı ordu guya məhv edilmiş Qarabağ ordusu ilə birlikdə Şuşa, Laçın, Kəlbəcər ətrafında strateji yüksəklikləri nəzarətə götürür, tükü də tərpənmir.
Bu adama çatmır ki, Qarabağda rus-erməni ordusu hücum mövqelərinə çıxır, növbəti hərbi eskalasiyaya hazırlaşır. Sanki vecinə deyil ki, iki Qarabağ müharibəsində şəhid olanlar və bundan sonra xəyanətkarcasına yarımçıq qoyulmuş işi sona çatdırmaq üçün qaçılmaz olaraq veriləcək qurbanlar sadəcə resurs deyil, hərəsi bir ömürdür. İndi ozünün, ətrafındakıların balaları orada yoxdur deyə qalanlar qurbanlıq quzu deyil ki.
İndi hərəkətsizlik vaxtı deyil. Regionun oyunçu dövlətlərinin gedişləri vəziyyəti günbəgün mürəkkəbləşdirir, gərginləşdirir və bu vəziyyətdə gecikmədən qabaqlayıcı tədbirlərin görülməsi həyati əhəmiyyət daşıyır. Rusiyanın ətəyi buraxılmalıdır, rus avtokrat rejimi dövlətimizin düşmənidir. Avtokratiya qardaşlığı sənin taxtını bir müddət qoruya bilər, amma öz xalqına dönüşünün qarşısında sədd olar. Dərhal Türkiyə ilə hərbi-siyasi ittifaq bağlanmalı, Qərbə inteqrasiya işləri sürətləndirilməlidir. 10 noyabr bəyannaməsi masaya qoyulmalı, pozulan öhdəliklər daha şiddətlə qabardılaraq işğalçı ordunun oradan çıxarılması istiqamətində zəminlər hazırlanmalıdır.
Buraxılan hər gün vəziyyəti daha da qəlizləşdirir. Pandemiyadır deyə etirazlar olmayacağına çox da bel bağlamayın. Dövləti güdaza verməyə sizə imkan verilməz.