AXCP sədri Əli Kərimli
Hökumətin başı qarışıb benzinin, çörəyin qiymətini qaldırmağa, əlillərin aldığı müavinəti ləğv etməyə, Əlizamin Salayev, Niyaməddin Əhmədov və digər siyasi məhbuslara divan tutmağa, Rusiyanın Qarabağdakı silahlı qüvvələri də öz işğal zonasını addım-addım genişləndirir.
Xüsusilə general-mayor Kosobokov Qarabağdakı Rusiya “sülhməramlılarının” komandanı təyin edildikdən sonra Azərbaycanın yeni-yeni əraziləri, əsasən də strateji yüksəkliklər Rusiya ordusu tərəfindən daha intensiv şəkildə nəzarətə götürülür. Yəni “sülhməramlıların” nəzarət etdiyi ərazilər gündən-günə genişlənir. Buna əslində sürünən işğal da demək olar. Qarabağdakı işğal zonasının genişləndirildiyi Rusiya “sülhməramlılarının” özlərinin təqdim etdiyi xəritələrdə də aydın şəkildə görünür (mənbə və xəritələr şərh bölümündə).
Belə ki, sentyabrın 14-dən başlayaraq Rusiya hərbi kontingentinin xəritəsində Kəlbəcər rayonu ərazisindəki qədim türk-xristian məbədi Xudavəng “Dadivank” adıyla xüsusi işarələnib. Ayın 16-dan isə “Laçın dəhlizi” “genişləndirilib”. Laçın şəhəri yaxınlığında 2072 metrlik yüksəklik, Şuşa rayonunun sovet dövründən ermənilərin yaşadığı Kiçik Qaladərəsi kəndi “Kirov” adı ilə qeydə alınıb. Həmçinin Şuşa rayonunun Məmişlər, Dükanlar, Qaybalı kəndləri, Turşsu qəsəbəsi yaxınlığındakı 2214 metrlik yüksəklik (yəqin ki, Keçəldağ) “sülhməramlıların” nəzarət etdiyi ərazi kimi göstərilib. Bundan əlavə, Xocalı rayonunun Harov, Xocavənd rayonunun Mirikənd kəndi (“Miruşen” adıyla), Çartar, Avdur, Yenikənd (“Norşen”) kəndləri, eləcə də Ağdam rayonunun Gülablı kəndinə yaxın strateji Qalınqaya yüksəkliyi də “sülhməramlıların” nəzarət etdiyi ərazilər kimi qeyd olunub.
Əziz həmvətənlər, gördüyünüz kimi, Rusiya artıq Azərbaycanı yalnız sözlə hədələmir, konkret ərazilərimizi bizdən soruşmadan götürür öz nəzarətinə. Sanki bu torpaqların heç sahibi yoxdur.
İlham Əliyev hakimiyyəti bu sürünən işğala susur. Çünki Rusiyanı özünün xalqdan qopmuş hakimiyyətinin əsas təminatçısı sayır. Azərbaycanın suveren hüquqlarını müdafiə etməyə cəsarət etmir. Xalq olaraq biz susmamalıyıq. Rusiyanın Qarabağdakı işğal zonasını böyütməsinə, Azərbaycandakı rejimin isə bu rəzalətə susub göz yummasına hamılıqla etiraz etməliyik.