AXCP Rəyasət Heyətinin üzvü Fuad Qəhrəmanlı
Belə görünür ki, hakim komanda uzun müddətli perspektivlərlə bağlı planları bir kənara qoyub, harda qırıla – qırıla prinsipi ilə hakimiyyəti əldə saxlayır.
İlk baxışda inandırıcı görünməyə bilər, ancaq aparılan siyasət bunu göstərir. Çox sadə məntiqdir, ölkədə əhalinin yaşayış şərtləri getdikcə ağırlaşırsa, işsizlik sosial bəlaya çevrilirsə, insanların gəlirləri onların ehtiyaclarını qarşılamağa yetmirsə, o zaman, dövlətin su, elektrik, qaz qiymətlərinin qalxmasından sonra yanacağın da qiymətini bahalaşdırması açıq – aşkar cəmiyyəti talamaq, soymaqdır.
Əvvəlki illərlə müqayisədə sosial müavinətlərin məhdudlaşdırıldığı indiki şəraitdə bu cür bahalaşma siyasətii açıq aşkar cəmiyyəti sosial partlayışlara sövq etməkdir.
Hökumət isə vəziyyəti nisbi də olsa dəyişmək üçün islahatlara getmir, iqtisadi təşəbbüskarlığı və fəallığı canlandırmaq üçün heç bir addım atmır. Əksinə, büdcə problemləri və dövlət şirkətlərinin uğursuz fəaliyyətinin yükü xalqın üzərinə qoyularaq insanların həyat şərtləri daha da ağırlaşdırılır.
Öz gələcəyini düşünən hakimiyyət xalqı özündən narazı salmaq üçün bu qədər acgöz davranarmı? İnsanları özündən narazı salmaq üçün bu qədər bahalaşmaya rəvac verib cəmiyyəti özünə qarşı qoyarmı? Heç bir iqtisadi, hüquqi islahatlara getməməklə, vəziyyətin gündən günə pisləşməsinə seyrçi kimi baxarmı? Bu yalnız o halda mümkündür ki, xalq ayağa qalxıb dur deyənə qədər fürsətdən istifadə edib, bacardıqca çox oğurlayıb, çalıp – çapıb talasınlar ki, sonra hakimiyyətdən qovulanda da gözləri arxada qalmasın.