Milli Şuranın sədri, professor Cəmil Həsənli
Milli Şuranın rəhbərliyində təmsil olunan Vidadi Mirkamala qarşı hakimiyyətin təqib və repressiyaları sözün tam mənasında rəzalətdir, siyasi rəzalət, sosial rəzalət, maddi və mənəvi rəzalət. Siyasi və vətəndaşlıq mövqeyinə görə hüquq elmləri doktorunun, ədliyyə generalının pensiyasını kəsir, hələ üstəlik üzərinə 103 min manat cərimə yükləyir və bu saxta cərimənin bədəli kimi Vidadi müəllimin əmlakın siyahıya alırlar.
Milli Şuranın öncüllərindən olduğu üçün Vidadi müəllimin təqibləri xeyli əvvəl başlamışdı. Onun siyasi mövqeyinə görə övladların işdən çıxarmışdılar, işsiz qoymuşdular, telefon danışıqların izləyib və sosial media üzərindən yazışmaların qeydə almışdılar, Mütəşəkkil Cinayətkarlığı çağırıb təhdid etmişdilər, təhdidlər nəticə vermədikdə səs yazıların nəzarətlərində olan şəbəkə vasitəsi ilə ictimailəşdirmişdilər. Bu da bir nəticə vermədikdə adamın qanuni haqqı olan pensiyasına əl atdırlar, saxta təftiş aparıb pensiyasını kəsdilər, mövcud qanunlar cərçivəsində aldığı pensiyadan ona qarşı 103 minlik cərimə sanksiyası düzəltdilər.
Eyni vəzifədə işləyib eyni qanunlarla pensiya alan şəxslərdən daha kimlər belə vəziyyətlə üzləşib? Şübhəsiz ki, heç kim. Vidadi Mirkamala münasibətdə belə “müstəsnalıq” onun “arzuolunmaz” düşərgədə olması, Milli Şuranın rəhbərliyində təmsil olunması ilə bağlıdır. Məlumdur ki, pensiya təminatı fərdi xarakter daşımır, müəyyən dövlət vəzifələri tutmuş adamlar eyni qaydada, eyni məbləğdə pensiya alırlar. Vidadi müəllim uzun müddət Azərbaycan İnzibati İqtisad Məhkəməsinin sədr müavini işləyib, ədliyyə generalı olub. Bu sahədə işləyib pensiya çıxanlar hansı qaydada pensiya alırsa Vidadi müəllim də eyni qaydada pensiya alıb. Əgər bu düz deyilsə, Vidadi Mirkamaldan başqa daha kimlərin pensiyası kəsilib və üzərinə küllü miqdarda maliyyə sanksiyası qoyulur. Bu baxımdan nəinki xoruzun quyruğu görünür, xoruz özü ayaqlarını yerə bərk-bərk dirəyib cəmiyyətin üzünə uca səslə banlayır, özü də sübh vaxtı yox, günün günorta çağı.
Belə natəmiz əməllərə görə Azərbaycan hakimiyyəti, ölkədə belə rəzaləti yaratmış İlham Əliyev bir az utanmalıdır. Bu ölkədə milyardları oğurlayan ofşor kralları minlərlə hüquqşünasa ədalət dərsi keçmiş bir professorun, hüquq elminə aid ondan çox kitabın və dərsliyin müəllifi olmuş bir alim və müəllimin pensiyasını kəsir. Oğurlanan milyardların bank qəbzləri ortada ola-ola, hakim ailəyə məxsus dünyaya səpələnmiş mülklərin hesabını itirənlər Vidadi müəllimdən pensiyasının hesabını sorur, ona qarşı maliyyə sanksiyası tətbiq edirlər.
Əlbəttə, Vidadi müəllimə qarşı baş verənlər Milli Şuraya qarşı hakimiyyətin apardığı təqib, şantaj, repressiya siyasətinin tərkib hissəsidir. Bu istiqamətdə yeganə fakt deyil. Lap bu yaxınlarda saxta bir iddia ilə MŞ-nın rəhbərliyində təmsil olunan Gültəkin Hacıbəyliyə 85 min cərimə, 6 min faiz ödətdiriblər. Hətta 91 min manat ödətdirəndən sonra belə adamın evini və maşınını həbsdən azad etmirlər. MŞ-nın rəhbərliyində təmsil olunan Oqtay Gülalıyevin taleyi göz önündədir. İki ilə yaxındır adam canı ilə əlləşir. Qurumun rəhbərliyində təmsil olunduqlarına görə Gözəl xanım və Leyla Yunusun çəkdikləri hamıya bəllidir. İbrahim bəy bu yaxınlarda bu dünya ilə vidalaşanda boğazındakı işgəncə izləri hələ getməmişdi. Əli Kərimli bir il yarımdır ki, ailəvi kommunikasiya blokadasında yaşayır, internet və sosial mediyaya çıxışdan məhrum edilib. Hacı Taleyə dini fəaliyyətindən daha çox Milli Şurada təmsil edildiyinə və bu təmsilçilikdən imtina etmədiyinə görə az qala bir qərinə iş veriblər. Nurəddin müəllimin 3 övladın bir gündə işdən çıxarıblar. Tofiq Yaqublu ilə bağlı İlham Əliyevin “vintaçan” əməliyyatı hələ də başa çatmayıb və bu vint yerindəcə fırlanır. Bax gerçək mənzərə budur.
Milli Şuranın rəhbərliyə daxil olan şəxslərdən hansı birisi rayonlara toya və yasa gedirsə, həmin yaşayış məntəqəsində gecələdiyi tanışın səhər ailəvi polisə aparıb sorğu-sual edirlər. Vidadi müəllimin başına gələnlərdə bu mənzərənin daha iyrənc, daha rəzil, İlham Əliyevin bəyan etdiyi “hüquqi dövlətin” daha murdar təzahürlərindən biridir.