AXCP sədri Əli Kərimli
Rusiya Paşinyanı devirib, Köçəryanı hakimiyyətə gətirmək planına yenidən qayıtdı. Ermənistanda iyun ayında keçirilmiş parlament seçkilərində Paşinyan iqtidarını qoruyub saxlaya bilsə də, Köçəryan da Rusiyanın köməkliyilə ana müxalifət olaraq parlamentdə 29 yer qazana bilmişdi. Hələ o zaman bilinirdi ki, Köçəryan və arxasındakı Rusiya bununla kifayətlənməyəcək. Ermənistandakı hakimiyyət uğrunda mübarizənin yeni mərhələsi hələ qarşıdadır. Rusiya bütün vasitələrlə, o cümlədən Ermənistanı silahlandırmaqla bu ölkədə mövqelərini möhkəmləndirir. Paralel olaraq Rusiyapərəst deputatlar parlamentdə vaxtaşırı dava-dalaş salaraq qeyri-sabitlik görüntüsü yaradır.
Son vaxtlar Moskvada anti-Azərbaycan bəyanatlarının və hərəkətlərinin artması həm də Ermənistanda Rusiyapərəst qüvvələrin mövqeyini gücləndirmək üçün edilir.
Son günlərdə isə Ermənistanda siyasi hərarəti ciddi şəkildə artıracaq hadisələr baş verir.
Rusiyadakı hakim Vahid Rusiya Partiyasının Köçəryanı rəsmi görüşlər üçün Moskvaya dəvət etməsi Kremlin bu Xocalı qatili və revanşisti hakimiyyətə qaytarmaqda israrlı olduğunu ortaya qoyur.
Paşinyan da artıq ilk gedişini etdi. Məhkəmə hələ də istintaq altında olan Köçəryanın Moskva səfərinə icazə vermədi. Hərçənd, 44 günlük savaşdan sonra Ermənistan iqtidarı Köçəryanın Moskva səfərinə etiraz etməmişdi. İndiki etiraz onu göstərir ki, Paşinyan bu səfəri (səfər zamanı cızılacaq planları) özü üçün təhlükə sayır və bu təhlükəyə qarşı dirənmək niyyətindədir. Rusiyanın Köçəryanı Ermənistanda hakimiyyətə gətirmək üçün israr etməsi Azərbaycan üçün pis xəbərdir. Faktiki olaraq yeni müharibənin anonsudur. Təkcə ona görə yox ki, Köçəryan şəxsən əli qana batmış Xocalı qatilidir, həm də ona görə ki, Köçəryan Şuşa və Hadrutu işğal etməyi rəsmən erməni xalqına vəd edir.
İlham Əliyevin 10 noyabr bəyanatı ilə bəh-bəhlə Azərbaycana qaytardığı Rusiya torpaqlarımızda süni, işğalçı qurum yaratmaqla kifayətlənmir, hər şeyi edir ki, yeni müharibə anonsu etmiş, revanşist Köçəryanı Ermənistanda hakimiyyətə qaytarsın. Xalq olaraq hansı təhlükələrlə üz-üzə qaldığımızı bilməliyik. Rusiya silahlı qüvvələrinin ölkədən çıxarılmasının yol xəritəsini hazırlamalıyıq. İlk addım kimi Azərbaycan Türkiyə ilə birgə müdafiə haqda dövlətlərarası sazişi və Avropa Birliyilə strateji tərəfdaşlıq sazişini imzalamalıdır.