Олтиариқдаги “намунали узумзор” харобазорга айланди 

Фарғона вилояти Олтиариқ тумани ҳудудида жойлашган қирда минг гектар ерга узумзор барпо этилган. Лойиҳа очилишига Президент келиши режалаштирилгани сабаб ҳудуд қисқа вақт ичида жуда обод қилинган, минглаб одам жалб этилиб, ишлар шошилинч бажарилган.

Маҳаллий аҳоланинг сўзларига кўра, очилиш маросимигача ҳудуд намунали ҳолатга келтирилган. Бу жараёнда турли ташкилотлардан ташқари, кўчадаги мардикор аёллар ҳам ишга чиқарилган. Ушбу ишларга катта маблағ сарфлангани айтилади.

Бироқ Президент ташрифидан сўнг ҳудуд қаровсиз қолган. МФЙ раислари ва ҳоким ёрдамчиларига “ерни аҳолига ўтказиш” бўйича кўрсатма берилгани айтилмоқда. Шу тарғиботга ишониб, айрим оилалар узумзор ерларини олган.

Аммо амалда сув, инфратузилма ва қишлоқ хўжалиги ёрдами бўлмаган. Узумлар қуриб бормоқда. Айрим оилалар уйида ортиқча ишчи кучи борлиги учун баклашка ва систерналарда сув ташиб, узумни сақлаб қолишга уринган. Шунга қарамай, тахминан 70 фоиз ер майдони қаровсиз ҳолда қолган.

Шу билан бирга, ер олган аҳоли кредит тўлашда давом этмоқда. Илк уч йил ойига 300–400 минг сўмдан тўланган. Сўнгги бир йилда эса ойига 1 миллион сўм тўлашга тўғри келяпти. Бир ой тўлов кечикса, кейинги ойга фоизи қўшилиб, қарз яна ошмоқда.

“У ер бизга керак бўлмай қолди, лекин қуруқ ҳаво учун ҳар ой пул тўлаяпмиз”, – дейди шикоят қилувчилардан бири. 

Унинг айтишича, уч нафар фарзанди бор, турмуш ўртоғи кўчада майда-чўйда сотиб кун кўради, ўзи эса уйда 80 ёшли қайнонаси ва болаларга қарайди. Оила мактаб, боғча ва кундалик харажатларни қоплаш учун қариндошлардан қарз олишга мажбур бўлган.

Аҳоли Президент ташаббуслари жойларда қандай ижро этилаётгани, айниқса, бундай лойиҳаларнинг кейинги тақдирига ҳам эътибор қаратса, деб умид билдирмоқда.