Нишонда солиқ ходими 100 нафар фуқаронинг 108,5 миллион сўмини ўзлаштирди

Қашқадарё вилояти Нишон туманида 100 нафар фуқаро солиқ тўловлари учун нақд пул тўлаган, аммо маблағлар ҳисобга киритилмаган ва йўқолиб кетган.

Нишон тумани аҳолиси Давлат солиқ қўмитаси ва бошқа масъул идораларга мурожаат қилиб, 2021—2024 йиллар давомида ўзлари тўлаган мол-мулк ва ер солиғи маблағларининг йўқолиб кетганини маълум қилишди. Уларнинг таъкидлашича, туман солиқ инспекцияси ходими Бекмуродов Одина фуқаролардан 108,5 миллион сўм нақд пул йиғиб, маблағларни ўзлаштирган.

Фуқаролар дастлаб солиқ инспекциясига мурожаат қилишган, аммо масъуллар аниқ жавоб бермаган. Улуғбек ва Бобур исмли ходимлар эса уларга:
«Олдин нақд шаклда тўланган пуллар ҳисобга киритилмаган» деган жавобни беришган. Жабрланувчилар Бекмуродов Одинани бир ҳафта давомида солиқ идораси ёнида кутишган, аммо у ишга чиқмаган ва телефон қўнғироқларига жавоб бермаган.

Фуқаролар прокуратурага ва бошқа ташкилотларга мурожаат қилишган. Натижада, Солиқ бошқармаси шахсий хавфсизлик бўлими хизмат текшируви ўтказиб, Бекмуродов Одинанинг пулларни ўзлаштирганини тасдиқлаган. Аммо бу ҳолат юзасидан ҳеч қандай ҳуқуқий чора кўрилмаган.

Пуллар йўқолди, пеня эса ҳисобланди

Энг ачинарлиси, фуқаролар ўз маблағларини йўқотгани камлик қилгандек, уларга 40 миллион сўм пеня ҳисобланган.
Жабрланувчиларнинг иддао қилишларича, Бекмуродов Одина Қашқадарё вилояти Давлат хавфсизлик хизматида раҳбарлик қиладиган Муҳиддин исмли шахс ҳимоясида бўлгани сабабли, иш ёпиб қўйилган.

Ҳозиргача Нишон туман прокуратураси ҳам, вилоят солиқ хавфсизлик бўлими раҳбари ҳам жабрланувчиларнинг даъволарига муносабат билдирмаган.
Фуқаролар Давлат солиқ қўмитаси раиси Шерздо Қудбиевдан шахсан хизмат текшируви ўтказишни ва йўқолган маблағларни қайтариш чорасини кўришни талаб қилишмоқда.

«Ахир биз фуқароларнинг зарарини ким қоплайди?» – дейишмоқда жабрланганлар.

Бу ҳолатга давлат идоралари қандай муносабат билдиради? Солиқ қўмитаси жабрланган фуқароларга қандай ёрдам кўрсатади?

Кузатишда давом этамиз.