يا ليمون مين يشتريك!!
الحنينة الطيبة كانت في سوق الليمون فكراها أول مره نزلت فيها هناك كنا رايحين نجيب حاجات للبيت مع جدتي ومعدين من باب الشعرية نزولا من الشعراني لحد "سوق الليمون "، كنا في دخلة أعياد ، و شم النسيم كانت ريحتة قربت والنسايم بتهل علينا .
كانت الناس وقتها هاديه وبالها رايق ، الموظفين الصبح في الشغل و إحنا في المدارس و نرجع نتغدي و نريح ساعتين و نصحي علي ريحة الشاي البراد ساعة المغربيه ، ولا شوب الليمون بعد اكلة الفسيخ ، كنا مبسوطين و أقل حاجة تبسطنا .
المهم السوق ده كان عظيم جدا اوي بالنسبه لي مكنتش متخيله ان فيه سوق بالحجم ده والشكل ده بيبع نوع واحد بس من الفاكهه او الخضره عموما ، مش عارفه السوق هو اللي كان كبير ولا انا اللي كنت صغيره لان طبيعي وإحنا صغار كل حاجة بتكون بنسبه لنا كبيره .
السوق ده كان كله لونه معصفر واخضر "سوق الليمون" اللي في اول شارع الجمالية من دخلة باب النصر و انت رايح .
فلاحين كتير و بايعين قاعدين بكم رهيب من الشتل و القفف و العربيات الكارو و العربيات الزق ، كلها مليانه لمون اخضر و اصفر و معصفر .
اللي عرفته من جدتي وقتها ان بايعين الليمون بيجوا السوق ده و ياخدوا بضاعتهم ويستلموها من هنا ، و بعدها ابتديت اتخيل ان كل الليمون اللي في العالم يتجمع هنا من وقتها اختزن في عقلي فكره ان اي بياع في شارع او في اي محل او عي اي رصيف اكيد راح جاب من السوق الكبير ده ، السوق كان كمان مشهور بالزيتون الاخضر ده اللي بيخللوه وساعات بيخللوا معاه لمون معصفر بيبقي طعم اوي و يفتح النفس علي اي اكله..
انا فاكره كويس اوي مره كنت في المدرسه وكان فيه شجره كبيره اوووي طلع أسمها شجرة لمون مش عشان بتنزل لمون لا عشان بتزهر زهرة لونها ابيض وقلبها اصفر وريحتها فعلا ريحة اللمون ، سمعت ان زمان كانوا اولاد الذوات بيقطفوا من الشجره دي و يفركوه الزهره بين ايديهم و يحطوها جوا هدوهم و ساعتها ريحتهم بتبقي منعشه جدا و كلها ريح ليمون.
كان المشروب الصيفي عصير ليمون الخلاط مع نقطة لبن خفيفة كان شفشق كبير قادر علي انه يروي عطش بيت العيله كله وينعشه .
غني لليمون فريد الاطرش "فوق غصنك يا ليمون لأكتب بدمع العيون ، و بدرية السيد لما قالت " يا لمونه فوق السجر" و المسلسل الإذاعي "دواخيني يا لمونه" و دينا مسعود لما غنت " و آه يا لمونه بزهره"
كان دوا التعبان في شتا البرد و فيتامين سي للأطفال والغلابه و ارخص مشروب لاي اتنين عشاق في جزيرة الشاي بجنينه الحيوانات .
كان الكيلو ب 60 قرش مش 100 جنيه ..
الليمون كان حنين علي الناس في كل موسم كان لما اتنين يتخانقوا بيطلوا لهم اتنين لمون عشان يروقوا دمهم دلوقتي ممكن نطلب لهم ايه!
إنا زمان مكناش عارفين نودي الليمون فين من كتره ما كان بيدبل علي الأرض زي ما قال الكينج محمد منير شجر الليمون دبلان علي أرضه
