خالد علي .. فرصتنا الأخيرة

بقلم: عمرو بدر فى يناير 22, 2018

انا مبسوط بشعار حملة خالد علي : طريق لبكرة .. 

والحقيقة الأكيدة والراسخة بالنسبة لي هي إن خالد علي #فرصة والله العظيم .. 

خالد علي مش مهم يكون مسار تقييم واحنا بنجاوب على سؤال هو ممكن ينجح ؟ .. المهم هو الإجابة على سؤال هو اللي بيعمله خالد وأنصاره له نتيجة هنشوفها بكرة ؟ والإجابة آه طبعا له نتيجة ونص كمان !! 

لو خالد علي طرح صوت مدني مختلف مدافع عن الحريات والتنوع والديمقراطية واحترام حقوق الإنسان بس يبقى اللي بيعمله له نتيجة هنشوفها بكره .. 

و فتح ثغرة في جدار الاستبداد ومسح بكرامة الديكتاتورية الأرض وكشف ضعف وتلط وهشاشة السلطة الحالية يبقى اللي بيعمله له نتيجة هنشوفها بكره .. 

لو طرح طريق مختلف وبرنامج فيه سياسات أكثر عدلا وانحيازا للفقرا وضرب كرسي في كلوب سياسات الانحياز للاغنياء والكبار وروشتة صندوق النقد والتردي الاقتصادي يبقى اللي بيعمله له نتيجة هنشوفها بكره .. 

لو أحيا الأمل عند ناس كتير بعد ما وصلت للإحباط واليأس ورجع صورة ثورة يناير بهية متألقة جميلة زي ما هي يبقى اللي بيعمله له نتيجة هنشوفها بكره .. 

بصرف النظر مين ممكن ينجح في الانتخابات عنان ولا السيسي خالد باللي بيعمله بيقول إن المعارضه هيقودها قوى يناير ، مش اللي هيسقط من السيسي وعنان ، ودي أهم نقطة في الموضوع كله ، معركة خالد هتخلي المعارضة في مصر في المستقبل القريب بيقودها بوضوح تيار يناير بروحه وشبابه يعني تيار يناير هيبقى موجودة في المشهد بقوته  ومعارضته اللي بجد مش المعارضة  التمثيل  .. 

#خالد_علي فرصة يا إخواناوالله .. بلاش تخسروها 

اعملوا توكيلات لخالد وامنحوه الفرصة .. لعل وعسى ..

بنزول سامي عنان للانتخابات وعلى عكس كلام ناس كتير فرصة خالد علي في تقديري بقت أكبر في إنه يعمل معركة انتخابية محترمة .. ليه ؟ لأن خالد أصبح الصوت الوحيد اللي بيقول كلام مختلف .. معبر عن أجيال جديدة زهقت من القديم كله ، أجيال عندها رغبة حقيقية في التغيير الجذري وفي بناء دولة عصرية قايمة على الحريات والديمقراطية والعدالة الاجتماعية واحترام حقوق الإنسان ، خالد علي هو الصوت الوحيد والأصيل في قضايا من النوعية دي ، وتاريخه مرتبط بشكل كبير جدا بدولة بالدفاع عن دولة القانون والحريات العامة والعدل الاجتماعي .. 

نزول سامي عنان للانتخابات هيخلي كل الناس اللي عاوزه تصوت بشكل عقابي ضد دولة مبارك ، اللي بيمثلها عنان ، ودولة الثورة المضادة اللي بيمثلها السيسي يختاروا خالد علي كحل وسط بين الدولتين ، حتى المختلفين مع خالد فكري في ظني هيعملوا كده .. 

خالد علي بقى رقم صعب فعلا في معادلة الانتخابا لانه بيمثل تيار كبير موجود فعلا لكن مشكلة التيار ده انه محبط أو يائس من الأوضاع الحالية كلها ، ودي هي المعركة الكبيرة اللي لو نجح خالد وحملته فيها يبقوا فعلا عملوا حالة محترمة وهتظهر في النتيجة النهائية للانتخابات .. 

خالد علي فرصة لناس كتير يارب متضيعش مننا ..