في 10كبسولات .. ليه "مش هنقاطع الاستفتاء" المرة دي ؟؟

بقلم: اسراء عبدالفتاح فى أبريل 8, 2019

1- قالك نتيجة الإستفتاء معروفة هنروح نعمل ايه ... 

أغلب نتائج الاستفتاءات في العالم كانت نتيجتها معروفة وهي نعم ماعدا كام استفتاء 

فقط لا غير علي ما أتذكر والناس نزلت عادت وصوتت وهي عارفه النتيجة .

2- لو نزلنا هندي الإستفتاء شرعية 

مقاطعتك أمام الحشد اللي هتقوم به الدولة هيبقي مش متشاف .. فالناس هتنزل برضاها

أو غصب ومقاطعتك مش هتقلل ولا هتزود في " لا مؤاخذة الشرعية "

3- بقالنا كتير ساكتين ومقاطعين وبنهرب أو بنحاول نهرب وبنقلش علي حالنا علشان 

نعف نعيش ... فمحتاجين أي فرصة نعرف نقول فيها " لأ " علشان منتحولش

تماثيل محنطة . 

4- بقالنا كتير بنتقابل صدفة في جنازة أو عزاء أو فرح أو مناسبة تعالوا نتقابل

في ميعاد معلن ومعروف ورسمي فهمي نظمي نحس ان احنا لسه فينا نفس ولسه 

بنعرف نرفض سلطة بتفرض نفسها علينا .

5- يمكن نحس ان احنا مش لوحدينا بنكتب علي الفيس بوك وأصحابنا بس هم اللي بيردوا علينا

يمكن نعرف ناس تانية شبهنا في الشارع بس مفيش فرصة نعرفهم ونتعرف عليهم 

وطابور الاستفتاء فرصة ناخد وندي - بشكل ودي وأمن - مع بعض ونخرج من خنقة السوشيال ميديا لهواء الشارع 

6- يمكن يكون ده فعل احتجاجي آمن يعني يمكن نعرف نقول لأ من غير ما يتقبض علينا .. بس لو 

مكنش آمن وحد اتقبض عليه " فآني أسف " 

7- ما احنا مش عارفين نعبر عن رأينا بأي طريقة تعالى نعبر عنه بالطريقة اللي اتفرضت علينا 

يمكن يكون صوتنا ب " لا " بيحرك الجمود اللي احنا اتحنطنا فيه . 

8- ممكن نتفق نلبس لون واحد او نحط شارة واحدة وكل ما نقابل حد شبهنا

نحضن فيه ونوزع شوية حنان 

9- أنا كبرت وحاسة ان دي ممكن تكون أخر حاجة ممكن أقدر أقاوم بها وأقول لا 

وأحس اني لسه بعافر 

10- أخيرا الاستفتاء في الربيع والجو بديع وقفلي علي كل الموضيع .