نعم .. الشكل أهم من الشخصية
دايماً بنسمع الجملة الخايبه المبتذلة بتاعة ''الحلاوة حلاوة الروح '' أو أي جمله مشابهة تعني انه الشكل مش مهم، والروح والشخصية هما الأهم..
في الواقع بنكتشف انه الكلام دا كله غير صحيح..
في فترة طويلة من حياتي كنت بحاول أقنع نفسي بمنتهي العقلانية والتصالح مع الذات انه لازم ولابد مركزش مع شكلي أو أخليه يشكل لي أي عواقب في حياتي، وانه الأهم إني أهتم بتحين شخصيتي وتنمية ثقافتي وتعليمي ووعي..
واشتغلت فترة طويلة وسنين علي نفسي (ومازلت)، ولقيت نتيجة لا بأس بها من حيث التقدم الاجتماعي والعملي الي وصلت له.
بس بعد فترة اكتشفت أنه أنا اصراري واهتمامي المبالغ فيه اتجاه التعليم المستمر والنجاح كان مجرد نتيجة لرفض المجتمع لشكلي.. أو بمعني أصح لأني بمقاييس المجتمع شكلي لا يصنف من الجميلات أو الفاتنات فا كنت بحاول أعوض نقص جمالي (الي رسخه فيا المجتمع) بالتعليم والشغل والنجاح المادي والعملي.. و ادعاءي الدائم انه شكلي مش مهم ومش هيفرق أوي في حياتي طول مانا شاطره وبطور من نفسي اكيد هلاقي فرص وهجبر المجتمع انه يحم عليا من خلال تعليمي وانجازاتي مش من خلال شكلي..
بس علي العكس لحظت انه صديقاتي او البنات عموماً اللي بمقاييس المجتمع يصنفوا من الجميلات يحصلن علي فرص أسهل واحياناً أفضل.. بدون ما يبذلوا ربع المجهود الي انا ببذله..
حاولت لوقت طويل اكذب نفسي وأقول انه اكيد دي مش قاعدة عامة وانه أكيد كل محاولاتي ومجهوداتي لها نتيجة ملحوظة وعادلة، وانه حتي لو بعض الجميلات بيعتمدوا فقط علي شكلهم واستغلال إعجاب المجتمع بيهم في الحصول على مرادهم أو لـ الحصول على وظيفة.. فا غالباً دا حالات قليلة، وانه اكيد في الأول والآخر كل واحد بيحصل علي نتيجة تعبه ومجهوداته وانه صاحب العمل أو الشركة مش هيختار فلانه للوظيفه عشان هيئتها أو شكلها فقط، ويتجاهل جهلها!
ولكن للأسف دا برضه مش حقيقي
في كام ممثله في الوسط الفني بتحصل علي شهرة وإعجاب الجماهير والمخرجين وهي شكلها عادي ب مقاييس المجتمع؟ قليل جداً وغالباً برضه بتكون الممثلة العادية دي مادة للسخرية والتريقه في المسلسلات والأفلام والأعمال الفنية
الفنانات الي الجمهور بيفضل يشارك صورهم علي مواقع التواصل الاجتماعي ويتغزلوا في اداءهم وحلاوتهم بتكون الفنانة جميله جداً فعلاً، مش عادية ولا حاجة، ولو كانت عاديه مكنش الجمهور هيديها نفس التركيز والشهرة والمتابعة الي بيديها للفنانة الجميلة.. ويمكن كمان كان هيتنمر عليها بسهولة لو مش عجباهم..
في وظائف كتير جداً لا تتطلب مجهود او خبره بس بتتطلب مظهر حسن فقط! وبتكون المرتبات والعائد المادي ليها كبير..
حتي في الحياة الاجتماعية بنلاحظ انه الناس دايماً بتتشد وبتبقى مهتمة اكتر تتعرف وتقرب للـ البنت او الشخص عموماً الي بمقاييس المجتمع شكله جميل وحلو ومختلف..
دا مش معناه انه كل محاولاتنا للتثقف والنجاح زائفه وفاشله.. بالعكس بتجيب نتيجة لطيفه جداً ومرضيه
ولكن علي الناحية الأخرى في نسبه كبيره جداً من الأشخاص من نفس سننا وظروفنا وجيلنا بيحصلوا علي نفس النتائج والنجاح الي بنحصل عليه بس بمجهود أقل وب سعي أقل وبمحاولات أقل وبطرق أسهل عشان ببساطه هما بمقاييس المجتمع أجمل في الشكل،
وفي البعض كمان بيحصل علي شهرة عظيمة وكبيره بدون اي انجاز او محاولات اصلاً نهائي بس عشان اتولد شكله حلو! (شكله حلو ب مقاييس المجتمع)
*أحب أوضح في النهاية اني كررت جملة ''مقاييس المجتمع '' أكثر من عشرة مرات، لأنه الجمال واسسه بيختلف من مجتمع لمجتمع ومن شخص لشخص، والجمال نسبي زيي اي شئ في الوجود، ممكن الجميل في رأيي ووجهه نظري يكون في وجهة نظرك عادي ومش حلو والعكس صحيح، (ولكن مقاييس الجمال في مجتمعنا العربي معروفه ومتشابهه بشكل كبير عند معظم الأشخاص وآرائهم). وعشان كده في النهاية كل حد فينا جميل المظهر والشكل واطبع بطريقة ما، حتي وأن كان المجتمع الي عايشين فيه لا يصنفه جميل *
ولكن لو الحياة عادلة فا كانت من المفترض ان لا توضع مقاييس للجمال وتحصره في إطار أنماط سخيفة سطحية ثابته.. كان من المفترض أن يحصل الجميع علي نفس الفرص والإهتمام بغض النظر عن وجهه نظر الآخرين في مظهرهم أو شكلهم.
