يعني ايه "قضاء مستعجل" ؟؟
خلي بال حضرتك إنه مفيش تعريف في القانون للقضاء المستعجل، بس فيه تعريف ليه عند اللي بيشرحوا القانون، وعند المحاكم الكبيرة، ودول قالوا إن القضاء المستعجل هو:
"الحكم بشكل مؤقت في المشكلات اللي متتحملش انتظار ومن غير ما يقول الحق لمين علشان يحافظ على الوضع القائم أو يحمي الحق الظاهر، ويصون مصالح الطرفين".
شوف حضرتك مثلا لو ابنك الصغير، ضرب طفل من عية كبيرة ورآه أخوه الكبير، ح يعمل إيه وحضرتك مش موجود؟.
ممكن ينزل ابنك الكبير، يفصل بين الطفلين ويقوم ضارب أخوه الصغير قلم ويعتذر للطفل التاني، وبكده المشكلة تكون انتهت مؤقتا لغاية لما حضرتك تيجي بالسلامة من شغلك. يمكن تيجي وتعمل مشكلة أو تعمل قعدة علشان تعرفوا مين غلطان وتحلوا المشكل حل نهائي.
اللي عمله ابنك الكبير ده هو بالضبط اللي بيعمله القضاء المستعجل، بيثبت الوضع علشان متبقاش فيه أزمة كبيرة وبعدين القضاء المدني يحل المشكلة تماما.
بس خلي بالك علشان تروح للقضاء امستعجل لازم تتوفر ثلاث شروط:
الأول: تكون المشكلة اللي حضرتك عايز حلها مشكلة مستعجلة وفيه خطورة إنها تستنى وقت طويل من غير حل مؤقت، زي موضوع ابنك الكبير كده، لو سكت أو طنش، أهل الطفل الثاني ممكن يعملوا خناقة كبيرة مع أهل بيتك وانت مش موجود.
الثاني: أن الحل بيكون حل وقتي بحفظ الأزمة في حدود أنها متكبرش، لكن مش مطلوب من القضاء المستعجل إنه يعطي حل نهائي، أو يقول مين غلطان ومين له الحق؟.
الثالث: خلي بالك إن اللي عمله ابنك لو عن قناعة إن أخوه غلطان والحق مع الطرف الثاني، يبقى ده غلط منه ويبقى قام بدورك انت وده مش مطلوب منه، وبالضبط كده القضاء المتعجل مش مطالب بإنه يقول مين صاحب الحق ومين المعتدي هو بس كل دوره إنه يحافظ على الوضع زي ما هو لغاية لما القضاء الموضوعي يقول ده حق مين وده حق مين.
وآخر حاجة لازم حضرتك تعرفها: أن حكم القضاء المستعجل ميلزمش محكمة الموضوع لأنه مؤقت زي ما قلنا، يعني ابنك الكبير لما ضرب أخوه علشان يخلص مشكلة ده مش معناه إن الصغير غلطان، ده معناه إن الكبير حفظ المشكلة في حدود مقبولة لغاية لما حضرتك توصل بالسلامة.
