شوال الرز
النادي الأهلي فريق كبير وطبيعي يكون ليه محبين وعشاق، من كل أنحاء العالم اعربي خصوصًا البلاد اللي تاريخها في الكورة كان دايمًا مرتبط بمصر. تركي آل الشيخ أحد عشاق هذا الكيان الأحمر على حد وصفه..وصف في بيانه أنه شعر بوضوح أنه عبارة عن " شوال الرز " اليي مطلوب منه يحقق رغبات محمود الخطيب واللي وراه علشان ينجح بأقل مجهود.
أنا الحقيقة مش عارف تركي بيبعزق من ماله، أم من مال جهات سعودية رسمية؟وإيه مصلحته تحديدًا في دعم محمود الخطيب ضد محمود طاهر؟ مع إن الاتنين أهلاوية والاتنين اسمهم محمود.
تركي قال إنه موٍل حمله محمود الخطيب ب ٥ مليون جنيه، هل من جيبه؟ هل هو مصري؟ وبما إن النادي الأهلي كيان أهلي مصري يخضع للقوانين المصريةن التي تمنع تمويل أجنبي لأي انتخابات على أرضها ودايمًا القوانين، بتحط سقف للإنفاق فكده إحنا أمام مخالفة جسيمه تتطلب استقالة هذا المجلس والإحالة للتحقيق.
أما في حالة إذا كانت الفلوس دي من جهات سعودية فلازم نسأل إلى أي مدى تتدخل أجهزة سعودية في الشأن الداخلي المصري لدرجة دعم مرشح على رئاسة نادي؟
اخطيب طلب من تركي فلوس لـ١-دعمه في الانتخابات، ٢- بناء استاد النادي الأهلي،٣- صفقة عبدالله السعيد، ٤- إعارة لاعبين مصريين للدوري السعودي، ٥- باقي حساب حسام البدري ٦٠٠ ألف جنيه، 6-مدرب أرچنتيني، ٧- مدرب تشيكي
بلغ إجمالي ما دفعه تركي ٢٦٠ مليون جنيه يعني حوالي ٦٠ مليون ريال سعودي، هل ده رقم من جيبه أم من جيب حاجة تانية؟إيه المقابل؟ شراء قوة ناعمة؟ دعم وابط سياسة؟إحكام السيطرة على المزاج الرياضي المصري؟
كل الي فات ده يودينا لحاجة كمان... ليه دولتنا ساكتة علي ده؟ الإجابة هو دايما كان سلوك أنظمتنا هو دعم المنظومة الاحتكارية.. الأهلي زي الحزب الوطني زي أي حزب حاكم .. كل أجهزة الدولة بتدعمه .. إعلام وقوانين ومؤسسات وأمن وعلاقات خارجية.
نقدر تسمي ده " الفساد الشامل" اللي لا يسمح بالمنافسة العادلة أو حتى شبه العادلة.
يفضلوا يكبروا في الحاجة وينجحوها ويحسسوا الكل كم هي عظيمة، فيتجمع حواليها الناس بالانتماء الوهمي اللي في حقيقته انتماء للي بيكسب من شخصيات من كتر ضعفها واهتزازها محتاجة تحس إنها بتكسب أي حاجة في حياتها.
منظومة تكره التنافس الشريف وتستحل الحرام ..آه والله، لا وبعد كده يطلعوا يقولوا نادي المبادئ، أهو ده جزء من الزيف اللي بنعيشه، زي ما الحزب الحاكم بيلعب لوحده ويطلع دراويشه ويقولوا طب فين المعارضة؟ فين الأحزاب؟
نقعد نهاتي ونقول يا جماعة لازم تعددية في كل شئ.. لازم تنافس حقيقي شريف.. لازم الكل ياخد نفس الفرص .. يقولولنا بس يا عملا ويا خونة ياللي عايزين تهدوا استقرار النادي الأهلي إنه يفوز بالدوري.
لازم نعترف ان منظومتنا الرياضه هشه وضعيفه لان الدوري عندنا مثير في ماتشين فقط بين الاهلي والزمالك كل سنه الي غالبا بتكون بطوله هذه اللقاءات للحكام 😁
على عكس الدوري الانجليزي الأقوى في العالم... أي فريق ممكن يكسب أي فريق في أي مباراة والدوري بيفضل مليان مفاجئات من بدايته لنهايته وده بسبب إن كل الأندية الانجليزية ليها نفس الفرص وتويل كبير يضمن لها أنها تكون على مسافة مناسبة من الفوز بالمسابقة.
عندنا الوضع عكس كده .. أقولك إزاي: الأهلي جاله ٢٦٠ مليون جنيه في ٥ شهور، في حين نادي أسوان لو كان معاه مليون جنيه، مكنش هبط ، ونادي الترسانة لو معاه ٥٠٠ ألف جنيه، كان زمانه صعد للممتاز، والمصري لو معاه ٢٠ مليون ، كان نافس على الكونفيدرالية والإسماعيلي لو معاه ٣٠ مليون كان أخد الدوري .. علشان كده معندناش رياضة حقيقية.
هتلاقوا نفس الكلام ده في حياتنا السياسية، لو الأحاب اتسابت تاخد فرصها وحجمها الحقيقي هنلاقي تنافسية، تطلع أفضل قوانين وأبرع ساسة وأدق رقابة، لكن هنقول إيه بقى في أشولة الرز اللي مش راضية؟
