أنا اتسرقت !!
نبدأ منين ؟؟
من حادثه فتاه المول ولا من أنى اتسرقت ولا نبدأ منين ؟
ولا نبدأ بأن القاهره اخطر مدن العالم على النساء ، ولا نبدأ منين ؟
هبدأ بنفسي من يومين نت خارجه لشغلى عادى جدا كأى امرأه عاملة ، مستعدة لكافة المضايقات اللي بضطر أتعامل معاها سواء تحرشات لفظية أو جسدية او حتى تزنيق بالعربية من بعض الاشخاص اللى فكرتهم عن المعاكسه انه يشيلك علي كبوت العربية.
النهارده بقي كان في تغيير .. اتسرقت
عربيه قررت تيجى جنبي وتشد شنطتى وتجرى ، وطبعا محدش لحقها وطبعا مش حابة أخوض في حالتى النفسية كانت عاملة ازاى بعد اللى حصل، من رعب بقي وعياط وصويت ومحاولات لانى ألحق العربية بعربية حد من اللى اتطوعو يساعدونى .
هي أه بائت بالفشل وممسكتش الحرامي الا اني فضلت في حالة من الرعب طول اليوم وبفكر في حاجة واحدة .
ان دى مش اول مره اتعرض لحادثة شبه دى في فترة زمنية صغيرة .
الاولى كانت فاشلة بس ربنا كرم الحرامي التاني ونجحت الحمد الله .
الغريب بقي ان الناس بقت بتتعامل مع وقائع السرقة دى بصورة عادية كأنه أمر اعتيادى وحاجه بتحصل وهتحصل فياريت منكبرش الموضوع ونستمتع كلنا بالمغامره يا جماعة.
بالمناسبه صحيح مكان حادثة السرقة بتاعتي اكشفت من كلام الناس ان كل أسبوع بنت بيحصل فيها نفس الواقعة .
مش هخوض في تفاصيل كتير وتعالوا نتكلم عن فتاة المول فاكرينها اه هى بتاعت ريهام سعيد اللى ريهام شهرت بيها وانتهكت خصوصيتها ونشرت صورها وقفلوا البرنامج كام شهر عقبال ما ننسي .
مالناش دعوه بكل ده عشان ريهام بتزعل بردو المهم ان البنت دى اتضربت بآله حاده في وشها مش ببالغ طبعا .
كلنا شوفنا البوست الخاص بالحادثة بردو وعرفنا ان اللى عمل كده الشخص اللي اتحرش بيها وضربته بالقلم في الواقعه السابقه .
الاخ ده بقي خرج بكفالة عشان احنا معندناش عقوبات رادعة للأسف الاخ طبقا لتصريحاته كان رايح يدبحها في عز النهار وقدام الماره وسط الناس .
وهى خارجه من صيدليه والاخ قرر يدبحها يعني شروع في قتل في المره الاولى اما اتحرش بيها خرجوه عشان ده تحرش مش مستاهله .
المره دى بقي شروع في قتل هيخرجوه بردو عشان يبقي محاوله ناجحه .
البنت طبقا لكلامها اتفادت الضربه وجت في خدها يعنى عاهه مستديمه في وشها .
مش محتاجه اتكلم ان احنا كبنات بيبقي وضعنا اني اما بس بيطلع لنا حبايه في وشنا ومدى لضيق اللي بنحس بيه لمجرد ان دى طبيعه المراه خلقت جميله لتزيد الكون جمالا
متخيلين البنت دى وضعها عامل ازاى وحاسه بايه ، عايشة في بلد انتهكتها بكل الطرق ، اتعرضت لتحرش و اللى عمل كده خرج بكفاله 100 ج مبلغ بردو
واتشهر بيها علي ايد اعلامية شهيرة وطبعا اتوقف برنامجها كام شهر ورجعت تاني مهو .. يا عم اقعد بس واشرب شاى دى الدنيا ماشيه وشعبنا نسااااى
افتح برنامج مكنتش البنت دى اللى شهرنا بيها واقتحمنا خصوصياتها وفضحناها وتختم ان بنت تتعرض لمحاوله قتل تخلص بعاهه
مش قادره احط نفسي بمكانها الصراحه الموضوع صعب بجد بنا فعلا يكون بعونها
ننتقل بقي لهاشتاج جديد اليومين دول #metoo
إذا قامت كل امرأة أو فتاة تعرضت للتحرش أو الاعتداء الجنسي من قبل بكتابة عبارة بسيطة مثل "وأنا أيضًا"، قد يشعر الناس بحجم المشكلة. #أنا_كمان
Me, too.
If all the women who have been sexually harassed or assaulted wrote "Me too." as a status, we might give people a sense of the magnitude of the problem.
ده نص اللى تناقلته البنات والسيدات اللى تعرضن للتحرش ، فيه بنات نزلت فيديوهات بتحكي الحوادث اللي حصلتلها ،وناس تانية اكتفت بكتابة الهاشتاج فقط .
وناس حكت معاناتها وتأثير التحرش اللي بتتعرضله لي حياتها وطبعا نشطاء دونوا علي الهاشتاج ودعموا.
بس مش هننسي بقي دور المتحرش المصرى الاصيل اللي اخترع التحرش الاليكترونى
علي ما اعتقد البعض رفض الهشتاج والبعض التاني قرر يتحرش اليكترونى بكل بنت نشرت علي الهشتاج ده
والبعض بردو وصف ان اللي بتكتب علي الهشتاج ده هي قليله الادب و انها اكيد من اللى بيتباهوا بده
او محاوله منها لتشويه الشارع اللي مليان امان
امان واخدلى بالك انت كل مره بندون معاناه بتشوفها المرأة المصرية بتقابل بحاله من الأنكار والتسفيه والرفض
في حين ان رفضكم لظاهرة التحرش والاستمرار في النكران وتحميل الست عبئ تعرضها للتحرش ش بيحل الازمه ولا هيطلعك شعب متدين بطبعه زي ما بتوصف نفسك في أى صدام مع رأى اخر او أى واقعه تبين مدى اللي وصلناله
وطبعا لازم اقدم تحيه عظيمه لكل الستات والبنات اللي دونوا علي الهشتاج واقول زيهم #METOO
وبردو هقول ان كل ما هتحاولوا تخرسوا صوتنا هنهتف بصوت اعلى ونقول علي معاناتنا عشان مش هنسمح باستمرار ده .
نيجي بقي لسبب اللي خلاني حكيت في كل اللي فات ده
من كام ساعه ظهر تقرير لمؤسسة تومسون رويترز أن القاهرة هي أخطر مدينة على النساء طبقا لتقرير أجرته مؤسسة تومسون رويترز. بشأن إجراءات حماية النساء من العنف الجنسي ومن العادات الثقافية والاجتماعية المضرة، وبشأن حقوقهن في العلاج واستقلالهن المادي، احتلت القاهرة المرتبة الأخيرة.
بالإضافة إلى الترتيب العام، صنفت دراسة تومسون رويترز المدن حسب الأقسام الفرعية . وكانت القاهرة ثالث أخطر المدن الكبرى للنساء من حيث العنف الجنسي ده بالنسبة إلى قدرتهن على الحياه دون التعرض لخطر الاغتصاب أو الاعتداء الجنسي أو التحرش ابطال احنا والله
اما بقي بالنسبة للجوانب الاجتماعية والرعاية الصحية والفرص الاقتصاديه فاحنا الحمد الله اخدنا المركز الثالث
قلتولى 2017 عام المرأة باين مش كده ؟؟
. القاهرة أسوأ مدينة للستات من حيث الممارسات الاجتماعية،من أول ختن البنات، والجواز المبكر والجواز القسري وبيع الطفلات فاضين ولا نقول كمان
بالنسبه لترتيب القاهرة في الفرص الاقتصاديه فربنا كرمنا بالمركز التاني الحمد الله نبدا من صعوبه توفر تعليم البنات وملكية الأراضي أو ممتلكات أخرى، والخدمات المالية. المدينة الوحيدة الأكثر فقرا من حيث إمكانيات القاهرة بس احنا مبنقولش بردو
الرعايه الصحيه بقي واحتلت مصر ثالث أسوأ مرتبة من حيث حصول المرأه على الرعاية الصحية بما فيها نسب وفاة الأمهات ومتابعة صحتهن الإنجابية وكله بالورقه والقلم احنا مبنجبش حاجه من عندنا هو عام المراه وهنخلص عليها
في النهاية انا م قادره اقول نهرب من البلد عشان اولا بنحبها ثانيا مفيش مفر قفلوا علينا من بره
بس الوعي هو اللي هيخلينا نكمل وناخد حقوقنا انا همشي فالشارع ومش هخاف وابطل شغل عشان اتسرقت.
وفتاه المول مش هتستخبي وهتجيب حقها وكلنا هنقول للتحرش لا ومش هنسكت ستات كتير نضالهم خلاهم احرار وغيروا قوانين
اذا كانت القاهره هي اخطر مدينه علي النساء في العالم فاحنا كستات اثبتنا اننا بنضحك في وش المخاطر
الحياه هتتعاش بس هنعيشها واحنا بنات مش خايفه من كونها بنات لأن ايه يسوى الكون من غير وجودنا الحريه ؟
والحياة خلقت لتزين روح امرأة
