بشرط "حسن المظهر"
مطلوب بائعات بمحل ملابس ويشترط حسن المظهر
مطلوب سكرتيره لطبيب ويشترط حسن المظهر
مطلوب أنسة للعمل باحدى المصانع ويشترط حسن المظهر
مطلوب أنسة للعمل بشركة سياحة ويشترط حسن المظهر
مطلوب عاملة تجيد الطبخ والاعمال المنزلية ويشترط حسن المظهر
يشترط حسن المظهر
أنسة تجيد الانجليزية يشترط حسن المظهر
يشترط حسن المظهر ...........
أنسة ...... مطلقة ...... حسن المظهر ..... التفرغ ......
،،يا عم يارتني كنت بجيبه كان زمانى اشتغلت ،،
الكلام اللي فوق ده كله بنسمعه ونشوفه طول الوقت اما بقي يا عم يارتنى بجيبه كان زمانى اشتغلت دى بتتقال من قطاع عريض من الرجاله شايفين طول الوقت ان مفيش اسهل من ان بنت تلاقي شغل ، الصراحه مش حبه ادمر احلامكم علي صخره الواقع الاليم .
بس ياريتك فعلا كنت بجيب عشان تعرف احنا بنعاني ازاى في رحله البحث عن شغل في حين ان كلمة يشترط حسن المظهر بقت من اهم ما يحمله اى " سي في" حتى لو شغل ده مش محتاج "سي في" ولا مؤهلات جبارة بس تفضل كلمة يشترط حسن المظهر محرك اساسي في البحث عن انثى للعمل في معظم اعلانات الشغل .
ومتعودين دايما على جملة ، هو "السي في" من غير صورة ليه ؟؟
ممكن تبعتي صورة ليكي قبل ميعاد المقابلة .
مش هنكر اننا دلوقت كسرنا تابوهات كتير اللى بتقول ان في شغل للستات وشغل للرجالة .
وان الست لما بتقرر تنجح في حاجه بتعرف تعمل ده حتى في ظل البلاعة الاجتماعية اللى بنعيش فيها ، بكل مشتملاتها من افكار ذكورية ، وعادات توارثناها، بدون تفكير .
وده اللى بنشوفه لما ست بيتوفى عنها زوجها وتكون مهنته الجزارة وبتنزل وتشتغل وتثبت نفسها لا وبتبقي حديث الصحف والمجلات كمان ، وبنشوفه بردو لما بنت بتكون مهنة ابوها المكانيكا او السمكرة وتنزل تشتغل بايديها كل دى نماذج ناجحه جدا في مجتمعنا رغم كل اللى بتعانيه من ناس بتقابل الفعل ده المدح او بالذم .
لكن اللى بتشوفه البنت في رحله البحث عن عمل ، هل المضوع سهل زى ما بيقولوا وان البلد دى مبيشتغلش فيها الا بنات وبس ؟
كان نفسي تبقي الاجابه اه وانه سهل او تبقي الاجابة الاساس بيكون المهارات اللي بتملكها البنت هى المؤهل لانها للاسف بردو مبتمشيش كده
الصراحة اغلب الوقت بنلجأ زينا زى الرجالة لموضوع الواسطة عشان نقدر نحصل علي عمل بدون اى مضايقات او تحرشات ، بتبقى ضمان كويس الصراحة وبتضمن بناء جدار حمايه على الاقل لفترة زمنية كويسة .
المراة في مصر وأكاد أجزم ان في الوطن العربي أكمله بتعانى من مصاعب اتفق عليها الجميع وهى ان مجال العمل و ارض خصبة للتحرش بكافه انواعه ، ابتداءا من الايحاءات الجنسية ، الى اخر الائمة .
وطبعا مش هننسي النظرة الذكورية العظيمة اللي بيتمتع بيها الرجل المصرى او العربي بشكل عام ، اللى بتقول ان طالما نزلتى شغل يبقي اشربي بقي ، انتى بتاعتنا .
ومش هننسي مشهد هند صبرى مع امها في فيلم عمارة يعقوبيان وهى بتقولها انها سابت الشغل بسبب تحرشات صاحب الشغل بيها ، وكان رد امها ان البنت الشاطرة الواعية هى اللي تحافظ علي شرفها من غير ما تزعل حد وكانه تصريح من الام بانها تمشي امورها ، وكملت ان مش مهم اى بيحصل المهم تفضل هدومها عليها الفيلم اتناول موضوع تحرشات في الطبقة الكادحة ، في حين ان التحرش اللي بنشوف مش مربوط ولا بطبقة اجتماعية ولا مستوى تعليمى ولا نوع الملابس ولا سن ولا اى حاجة ، حتى الوضع الاجتماعى أنسة / متزوجة /مطلقة كله بيتعرض لشتى انواع التحرش ، والمفروض منها انها تسكت لان دايما هيلاقي المتحرش في العمل بالاخص مبرر له يا اما لبسها يا اما هى اللي راوغته وكانه يوسف .
بعيدا عن ان الوعى عند المراه زاد مؤخرا ومبقتش تخضع وتسكت زى ما العادة حكمت بس لسه في قطاع عريض بيسكت تحت طائلة اكل العيش وان فرص توفير الشغل صعبة بحسب الاحصائيات فمصر
الأرقام المفزعة جاءت تحذر أن من بين مائة ست وجد 68 اتعرضن فعلا للتحرش الجنسي داخل محيط العمل سواء كان التحرش لفظيا أو بدنيا!
وأضافت الأستاذة - عزة سليمان- مدير مركز قضايا المرأة المصرية :أن ظاهرة التحرش الجنسي هي قضية "مسكوت عنها" في المجتمع المصري نظرا لحساسية هذه القضية، بالإضافة لعدم امتلاكنا ثقافة كيفية مواجهة مثل هذه الأمور.
ده طبعا غير اللى بتمارسه المرأة ضد المرأة نفسها ، وده بنشوفه لما تكون واحدة شاطرة جدا في شغلها بس مشكلتها انها حلوة.
اه والله وتبقي الازمة الاكبر لو كمان أنسة ، دي تبقي كارثة ، انا شفت حالات كتير بتسيب الشغل بسبب الغيرة ، وفيه صديقة ليا قررت تخلى جوزها ينهى شل مع مساعدة ليه لمجرد انها حلوة وذكية وبس ، وكان ردها اما اتناقشنا "هي قدامه علي طول ومش هحط البنزين جنب النار" ، والناحية التانية بنت بردو مشيت من الشغل بدون ابداء أسباب الا ان كل العاملين بالمكان أجمعوا ان زوجة صاحب الشركه بتعمل ده مع أي بنت حلوه تشغل نفس المنصب ودى غير انها حلوه فهى ناجحة .
لسه شايف انك "ياريتك كنت بجيبة" عشان تشتغل بسرعة ؟
نسال سؤال تاني معلش عمرك اشتغلت جرسون في مطعم او ممرض بمستشفي او عامل بمصنع واتحرش بيك صاحب العمل ؟
السؤال رخم مش كده معلش بس الهدف من سؤا هوضحه ، فيه مهن في بلدنا اللى بتشتغلها تعتبر مضت علي ورقه مفادها انها تصلح لتحرش الجنسي في اى وقت لمجرد انها بتشتغلها .
ده مش كلامى علي فكره ده كلامكم انتوا .
فى مره من مرات زياراتى لمستشفى شفت شاب بيبص لبنت من الممرضات وبيكلم اللى جنبه من غير ما يحس ان صوته عالي وانى قادرة اسمعه بيقوله بالنص "البت دى عايزة سرير " رد عليه صاحبه اتلم يا عم دى بتابع ابويا كان رده دى ممرضة يا عم شغلتهم يريحونا
لسه عايز تبقي بجيبه عشان تشتغل ؟
بيقولوا أن 30 % من العاملات في مصر يتعرّضن للتحرّش بانتظام في أماكن العمل، وفق دراسة أجراها الاتحاد العام لعمال مصر. وفي عا 2014، أدخلت تعديلات على قانون العقوبات ، فشددت عقوبة التحرّش اللفظي أو الفعلي لى السجن لمدة تتراوح بين ست شهور وخمس سنوات وغرامة حدها الأقصى 50 ألف جنيه. إلا أن المشرّع عاد وخفف العقوبة في قانون العمل الجديد المقترح، بحيث لا تشمل عقوبة التحرّش في أماكن العمل السجن، وتقتصر على غرامة بين ألفين و5 آلاف جنيه.
طب معلش اخر سؤال هو لو حضرتك متجوز ، ممكن لما تقدم على شغل ، يقولولك أسفين مش عايزين رجالة متجوزة ؟
اصل الست المتجوزة فرصتها في الشغل قليلة جدا للاسف.
بنات في الشغل يعنى مرتبات اقل
وبيتعمل كمان تمييز حسب اذا كنت متجوزه او لا ا مطلقه
لسه عايز تبقي بجيبه عشان تشتغل ؟
بس يشترط حسن المظهر
