اشكالية "الرقص والانتخابات" في مصر
طبعا اليومين دول اغلبنا بيألش على متلازمة الرقص والانتخابات و الكل بيبدع في الألش عن الموضوع دا بالاضافة للمحافظين اللي عمالين يقولوا شايفين المجتمع المش كويس اللي عمال يرقص وحكمهم على ان اغلب المؤيدين رقاصات والذي منه.
بس انا عندي كلمتين بخصوص موضوع الرقص قدام لجان الانتخابات دا و حابة افرق بين كام نقطة جوهرية هما ان الرقص حلو مفيش كلام وخلي الناس تتبسط مانبقاش احنا والهم والزمن عليهم بس الرقص ميكونش على اغاني بتتكلم عن شهداء ولا وطنية لاننا بنختزل المعاني الساية في فعل الرقص وبنخليها مبتذلة اوي.
كمان ربط الرقص بالانتخابات وبالصويت للسيسي هي ملاحظة شبه عامة .. بس لا يجوز فاحنا شعب رقاص اصلا دا غير أن مش كل اللي رقصوا على اغاني وطنية فاهمين معانيها السامية بسبب بساطتهم او عدم اهتمامهم كمان الشعب بسيط ونسب كبيرة منه لم تتاح له فرصة انه ينمي وعيه (منه لله اللي كان السبب) ودا لاحظناه كتير جدا فبلاش نتوقع حاجات تتطلب وعي كبير من البسطاء. دا غير كمان اني اكتشفت ان فيه طرق مختلفة للتعبير عن حب الوطن منها الرقص على الاغاني الوطنية!
الحاجة الاخيرة هي هل احنا مش ملاحظين اننا بنسيب كل حاجة بتحصل في العملية الانتابية سواء ايجابيات او انتهاكات وبنركز مع حالات الرقص اكتر؟ محستوش ان دا فيه ملامح بطريركية ذكورية شوية؟ فبلاش نعمل فيها حراس الفضيلة ارجوكم لأن المجتمع مش ناقص.
ومن رأيي ان لو فعلا عاوز اعمل تغيير حقيقي يخص الجزء الخاص بالانتخابات يبقى لازم اشوف آليات تفعيل الديمقراطية وآليات توسيع المشاركة السياسية متحققة ولا لا سواء كنت مشارك في الانتخابات ولا مقاطع، كمان اشوف هل العملية الانتخابية ماشية مظبوط ولا فيها انتهاكات واتكلم عن دا واوعي الناس عشان اكون فعلا قدرت اني افيد ومكونش جزء سلبي يتحسب جوا دايرة تغييب الوعي الجمعي
