بس متقولش انتخابات !!
ملخص موقفي حتي هذه اللحظة مما يقال عنه " انتخابات رئاسية قادمة " ، أري انها بالوضع الحالي لا تمت بأي صلة لكلمة " انتخابات " او حتي لها علاقة من قريب او بعيد بأي عملية ديمقراطية ، بناء عليه لا يصح استخدام لفظ " مشاركة " او " مقاطعة " .
فهل من الممكن أن تقوم انتخابات - عملية تنافسية نزيهة - في هذا المناخ المظلم العقيم من أي طاقة او حتي شعاع نور لحرية او عدل او شفافية !!!
أنتخابات ايه يا شعب وكل القنوات الإعلامية مملوكة بشكل او آخر للدولة إما ملكية مباشرة او عن طريق رجال أعمال معروف دعمهم الأعمي للسلطة الحالية ، الإعلام هو النافذة الأكبر والأوسع انتشارا اللي بيقدر من خلالها المرشح يوصل للناس ويبلغهم رسالته ويعرفهم برنامجه ويقدروا يحكموا عليه . هل بقي الإعلام بتاع الصوت الواح ده هيسمح لحد يظهر غير الرئيس الحالي والكومبارس اللي هيختاره الرئيس الحالي علشان يلعب دور انها نزيهه !!!
ده بقي غير ان حتي المواقع الإخبارية المستقلة او المعارضة محجوبة يعني حتي مش هتوصل لمؤيديك لو فكرت كمعارض تترشح !!! ويقولك أنتخابات !!
انتخابات ايه يا شعب والمنظمات الحقوقية الفاعلة المستقلة تحت قرارات التجميد والقائمين عليها ينتظروا محاكمة علي نشاطهم في المجتمع المدني !!!
دي المنظمات اللي مفروض هتراقب وترصد الانتهاكات وطبعا مستحيل هيخلوهم يعملوا ده . يقوموا يجيبوا منظماتهم تكلم اعلامهم ان الانتخابات عال ال عال !!!!
ويقولك انتخابات
انخابات ايه يا شعب وشباب الأحزاب والحملات اللي يادوبك فكروا يعملوا حزب تحت التاسيس ويدعموا مرشحهم محبوسين بتهمة غاية فى الضحك " دفاعهم عن الأرض " يعني ايه مرشح معارض من غير شباب علي الارض وحملة انتخابية طيب ده يحصل ازاي وانتي ماشين وراهم بيكلموا مين في الشارع وبيكتبوا ايه علي الفيس بوك علشان تلفقلهم تهمة وترموهم في السجن !!!
ويقولك انتخابات
وخد عندك بقي المرشح نفسه اللي لسه بيفكر او بيحلم عاملوا تهمة اكثر ضحكا تهمة مخلة بالشرف علشان ميترشحش ويقعد في البيت وبيقولك اصله عمر حركة قبيح بايديه فى الشارع وحضرتك كل اللي بتعملوا فينا ده حاجات حلوة وجميلة ملهاش علاقة بالقباحة !!!
انتخابات ايه يا زملا
من غير اعلام ولا صحافة ولا احزاب ولا شباب ولا مجتمع مدني
انتخابات ايه يا زملا
وزمايلك في السجن بتهم ملفقة كيدية للانتقام وبس
انتخابات ايه يا زملا
وانت مش لاقي موقع مش محجوب تكتب في رايك بالمناسبة مقالي ده مكتوب فى موقع محجوب " اضحك بقي "
انتخابات ايه يا زملا
والمرشح الوحيد اللي كان بجد هيلفقولوا تهمة علشان يقعد فى البيت
انا مش هقاطع لان ديه مش انتخابات اصلا انا هحيب فشار او لب واتفرج
وللتنويه بس مقالي ده بتاريخ النهاردة 10 اكتوبر يعني حتي هذا التاريخ ده موقفي وكلامي اللي مقتنعة بيه ، علشان فى ناس بتقولي يمكن تغيري رايك فبلاش تعلني موقفك دلوقتي
" لا " لما أغير رأي بناء علي مناخ سياسي ومعطبات بتتغير علي أرض الواقع مش عيب ولا حرام بس هي تتغير الأول !!!
