ها فكرتوا تاني ؟!!
بدات فكرة مختلفة ، محاولة لخلق مساحة جديدة لحرية التعبير ، بس بشكل جديد ، بلغة بسيطة ، بدون قيود او حدود لشباب اصغر شباب مختلف شباب مش عايز يختار وينقي فى الكلام قبل ما يحطه علي الورق ، شباب عايز يقول اللي فى قلبه علي ورقه .
شباب محتاج يكسر قيود وقوالب مجتمعية اتحبس فيها حجة بتتقال هي هي بس باشكال مختلفة " ايوة احنا كده " كبرنا لقينا كده " اتربينا علي كده " ، بس " كده " ديه مش ماشيه معاه مش حاسسها عايز يخرج منها ويطير فى عالم بتاعه هو اللي يشكله ويختاره ويغير فيه . محتاج يكتب عن ده ومحتاج يعرف من بيشاركه احلامه يضم عليه ، ومين بيختلف معاه ويناقشه مش مهم يقتنع المهم الاثنين يكونوا موجودين باختيارتهم بحرية بدون قيود .
فكر تاني مساحة لشباب مرن متغير متجدد بيفكر مرة واثنين وثلاثة ، مواقفه ممكن تتغير علي حسب التغيير المجتمعي والسياسي ، بيعيش علشان يتعلم ولما يتعلم بيكبر فيعيد حساباته ويسيب درس جديد ممكن يفيد اجيال أصغر يتعلموا وميككروش نفس الخطأ . مش بيكسف يقول انا فكرت تاني ولقيت ان فلان كان عنده ح وانا حسبتها غلط ، مش بيكسف يقول انا كنت صغير ومش فاهم ده وده وده واللي مرت بيه علمني وفهمني .
فكر تاني نجاحه بالنسبة ليه فى السنة الاولي هم " البنات " اللي كتبوا فى " هي بتفكر تاني " كتبوا في كل حاجة عبروا برأيهم سخطا علي قيود وحبا فى هوا الحرية والطيران والتحليق خارج قيود فرضها عليهم مجتمع شايف الست او البنت درجة ثانية بس هي شايفه نفسها لا يمكن تقبل بده بل هي أكبر بكتير وتستحق أكثر بكتير .
فكر تاني مساحة علشان تعرف تكتب ، تعرف تعبر ، مش لازم تكون كاتب ماهر تعرف اصول الكتابة والعبير علشان كلامك يتنشر لا خالص ، الأهم تكون انسان تعرف تعبر بحرية وبضمير ن ال جواك ، وشوية بشوية هتلاقي نفسك بتتطور فى الكتابة وبتكتب احسن وتفكر أحسن وتختار افضل المهم تبدأ ودايما بشوف فكر تاني نقطة للبداية والإنطلاق في فضاء التعبير عن النفس .
فكر تاني حاولت توصل اصوات صوتها محشور في عالم صامم آذانه عنهم ، شباب محبوس او مش موجود او موهوب ومش لاقي لموهبته مكان ، او شباب مطحون مربوط فى سايقة علشان يعرف يعيش او شباب لاجئ جيه أرض تانيه مغصوب بس إرادته وحماسه للحياه أقوي مهما تغيرت الأرض واتبدلت الناس .
فكر تاني تجمع لشباب مختلف ، راضي ورافض ، حالم ومنظر ، طموح ومشتت ، صغير متوسط وكبير سنا وخبرة .
بحلم ان مساحة فكر تاني تفضل موجودة ، وان الشباك يفضل يطل منه النور ، وان الجنينه يفضل يتزرع فيها كل الزهور ، وان الفضاء يفضل حامل كل النجوم . وان الصفحة تفضل مفتوحة وان الحروف تتشبك تعمل كلمات وان الكلمات تترص جنب بعضها تعمل فيضان مشاعر وافكار حرية .
وفي عامنا الثاني هتفضل الدعوة مفتوحة ان احنا دائما وابدا ن " فكر تاني "
