منتدى شبابنا وأجواء ما قبل الثورة
عدنا ، دي الكلمة اللي فكرت فيها اول لم سمعت عن فكرة المؤتمر ، عدنا فعليا لفترة ما قبل ثورة ٢٥ يناير ، مجموعة قليلة بتفكر في مواجهة النظام بالوسائل المتاحة .
قبل الثورة كان في مؤتمر سنوي للحزب الوطني و كان قرر مجموعة من الشباب انهم يواجهوا مؤتمر الحزب بمؤتمر القلة المندسة، كان الغرض من المؤتمر دة هو كشف حقيقة الوضع في مصر سواء كشف خطة التوريث او سوء الأوضاع الأقتصادية او سوء الأوضاع السياسية .
الغريب في الموضوع ان الأوضاع كانت في الفترة دي اكثر انفتاحا و كان في مجل للكلام عن الوضع الحالي ، بفكر اننا عدنا قليلين و عدنا بمؤتمر شبابي للرد على اكاذيب النظام الحالي اللي قاعد ينشرها عن طريق مؤتمر الشباب بتاعه.
في نفس الوقت كلمة عدنا ليها دلالة على اننا عدنا كمجموعة الشباب اللي اتفرقت بيهم السبل في متاهات ما بعد ١٢ فبراير ٢٠١١ ، ناس اتسجنت و ناس سافرت و ناس اخدت مسارات خطأ و رجعت
في الآخر كل الناس دي رجعت لأصل فكرة الثورة و لنقطة اتفاق واحدة و هي ضرورة مواجهة اكاذيب النظام الحالي بالمساحة المتاحة على ماقع السوشيال ميديا
عدنا قليلين بس عدنا مع بعض في اجواء اشبه بأجواء ما قبل الثورة ، اتمنى اننا نكون كلنا اتعلمنا من دروس الماضي و ان المؤتمر يكون بداية لتنسيق حقيقي لكل الشباب الصامد ضد النظام الحالي و اتفاق على هدف واحد هو الحق في العيش و الحرية و العدالة الإجتماعية
شعار ثورة ٢٥ يناير العظيمة ، هدف منزه عن اي اطماع او طموحات سياسية ، زي ما بدئنا على الأساس دة قبل الثورة .... نعود.
