Şirvan Milli Parkında nadir və maraqlı hadisə qeydə alınıb. Adətən sentyabr- oktyabr aylarında ölkəmizə köç edən flaminqolar bu il tez gəliblər.
Gununsesi.info–nun xəbərinə görə, bugün parkın ərazisində 30-a yaxın flaminqo müşahidə olunub.
Bioloji Müxtəlifliyin Qorunması Xidmətinin rəsmisi Arzu Babayeva Gununsesi.info-ya bildirib ki, flaminqolar ölkə ərazisində adətən sentyabr-oktyabr aylarında, yəni payız miqrasiyası dövründə müşahidə olunur:
”Şirvan Milli Parkında flaminqoların bu il daha tez müşahidə olunması cənubdan yuxarı istiqamətdə hərəkət edən və köç öncəsi yerdəyişmə edən quşların erkən miqrasiya prosesləri ilə əlaqəlidir. Hazırda parkda otuz beşə yaxın flaminqo müşahidə olunur”.
Qeyd edək ki, ilk iki flaminqonu isə turistlər 27 iyulda parkda müşahidə ediblər.
“Ümumiyyətlə flaminqolar hər il oktyabrın sonu, noyabrın əvvəlindən mart ayının əvvəlinədək əsasən Şirvan, Abşeron, Qızılağac və Ağgöl milli parklarının ərazisində müşahidə olunur” -deyə qurum rəsmisi bildirib.
Firuzə Mahmudova
