စစ်ကောင်စီနှင့်အတူ ချီတက်လိုက်ပါလာခြင်း၊ လမ်းပြခေါ်ဆောင်လာပေးခြင်း အပါအဝင် လက်နက်ခဲယမ်း၊ရိက္ခာများ သယ်ယူပို့ဆောင်ခြင်းမပြုလုပ်ရန် PDFဖယ်ခုံက ယနေ့ သတိပေးထုတ်ပြန်သည်။
လိုက်နာခြင်းမရှိဘဲ အတူတကွလှုပ်ရှားသွားလာပါက စစ်ကောင်စီကို ပစ်ခတ်ရှင်းလင်းတိုက်ခိုက်ရာတွင် ဖြစ်ပေါ်လာမည့် နောက်ဆက်တွဲထိခိုက်မှုများသည် ပြည်သူ့ကာကွယ်ရေးတပ်များနှင့် လုံးဝသက်ဆိုင်မှု မရှိကြောင်း အသိပေးသည်။
လက်ရှိ ဖယ်ခုံမြို့နယ်ရှိ ဖယ်ခုံ – မိုးဗြဲ ပြည်သူ့ကာကွယ်ရေးတပ် PDFများနှင့် စစ်ကောင်စီတပ် တို့သည် အချိန်၊ နေရာကန့်သတ်မှုမရှိဘဲ တိုက်ပွဲများ ပစ်ခတ်တိုက်ခိုက်မှုများဖြစ်ပေါ်နေသည်ဟုလည်း ဆိုသည်။
ထို့ကြောင့် ရန်သူစစ်အာဏာရှင်ကို အမြစ်ပြတ်တိုက်ခိုက်ရာတွင် နှောက်နှေးစေသော လုပ်ရပ်များ မပြုလုပ်ရန်လည်း PDFဖယ်ခုံက တိုက်တွန်းသည်။
“ဖယ်ခုံ ဘက်ခြမ်းမှာတော့ စကစလက်ကိုင်တုတ် PNO ပြည်သူ့စစ်အဖွဲ့ရှိတယ်။ရှမ်းတောင်ဘက်မှာ တိုက်ပွဲကလည်း မကြာသေးခင်ကဖြစ်ထားတာဆိုတော့ ရန်၊ငါ သေချာခွဲဖို့ ထုတ်ပြန်လိုက်တာလို့တော့ မြင်တယ်”ဟု ကရင်နီသတင်းရင်းမြစ်က လူထုနွေဦးသို့ ပြောသည်။
ယခုလဆန်းပိုင်းက အင်းလေးဒေသတွင် စစ်ကောင်စီ ၊ PNOပူးပေါင်းအဖွဲ့နှင့် အလယ်ပိုင်းတိုင်းစစ်ဌာနချုပ်လက်အောက်ခံ PDFတပ်ရင်းများအကြား တိုက်ပွဲဖြစ်ပွားခဲ့ပြီး စစ်အုပ်စုပူးပေါင်းအဖွဲ့မှသေဆုံးသူ ၃၀ဦးထက်မနည်းရှိမည်ဟု ကာကွယ်ရေးတပ်များက ခန့်မှန်းသည်။
အလားတူ အလယ်ပိုင်းတိုင်းတပ်ရင်းများအနက် ကျဆုံးဖမ်းဆီးခံခဲ့ရသော ရဲဘော်ငါးဦးထက်မနည်း ရှိခဲ့သည်။
