မလေးရှားမှာ နိုင်ငံကူးလက်မှတ်ထုတ်ပေးတာကို စစ်ကောင်စီသံရုံးရပ်ဆိုင်း

မြန်မာလုပ်သားတွေအများအပြားရှိတဲ့ မလေးရှားနိုင်ငံမှာ နိုင်ငံကူးလက်မှတ်ထုတ်ပေးတာကို စစ်ကောင်စီလက်အောက်ခံ သံရုံးက လာမယ့်ဖေဖော်ဝါရီလ ၆ ရက်က စတင်ပြီး ရပ်ဆိုင်းမှာဖြစ်ပါတယ်။

နိုင်ငံကူးလက်မှတ်ထုတ်ပေးတဲ့စက်နဲ့ကွန်ပြုတာပြုပြင်ရမှာဖြစ်လို့ ရပ်ဆိုင်းရတာလို့ အကြောင်းပြထားပါတယ်။

စက်တွေပြုပြင်ပြီးရင် နိုင်ငံကူးလက်မှတ်ပြန်ထုတ်ပေးမယ့်ရက်ကို ကြေညာပေးမယ်လို့စစ်ကောင်စီသံရုံးက သံရုံးရဲ့ဖေ့ဘွတ်ခ်ကနေ တဆင့်အသိပေးထားတာတွေ့ရပါတယ်။

စစ်ကောင်စီဟာ ပြည်တွင်းမှာလည်း နိုင်ငံကူးလက်မှတ်ထုတ်ပေးတာကို ရပ်ဆိုင်းထားပါတယ်။

ဒီလို ရပ်ဆိုင်းရတဲ့အကြောင်းရင်းကို တရားဝင်ရှင်းရှင်းလင်းလင်း လူထုကို အသိပေးတာမျိုးလည်းမရှိပါဘူး။

နေပြည်တော် စစ်ကောင်စီ စစ်ရုံးအသိုင်းအဝိုင်းနဲ့နီးစပ်သူတွေထံက တဆင့်သိရတာကတော့ ပြည်ပကိုထွက်ခွာသူများနေတာကြောင့် နိုင်ငံကူးလက်မှတ်အသစ်ထုတ်ပေးတာကို ပိတ်ထားတာလို့သိရပါတယ်။