ကရင်အမျိုးသားအစည်းအရုံး(KNU) တပ်မဟာ(၅)နယ်မြေ ဖာပွန်ခရိုင် မဲဝိုင်(မဲဝေ)ဒေသတိုက်ပွဲ၌ စစ်ကောင်စီတပ်မှ သုံးဦး ဒဏ်ရာရခဲ့ကြောင်း တပ်မဟာ(၅)က သတင်းထုတ်ပြန် သည်။
ဖေဖော်ဝါရီ ၇ရက်က နေ့လည် ၁နာရီခန့်တွင် ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ(၅) လက်အောက်ရှိ တပ်ဖွဲ့ဝင်များသည် မယ်ဝေအုပ်စု တိုမယ်ခီးကျေးရွာအခြေစိုက် အကြမ်းဖက်စစ်ကောင်စီတပ်အား ဝင်ရောက်ပစ်ခတ်ခဲ့ခြင်းဖြစ်သည်ဟု ဆိုသည်။
ထိုသို့ တိုက်ခိုက်ရာ၌ အကြမ်းဖက်စစ်ကောင်စီတပ်မှ သုံးဦး အပြင်းအထန်ဒဏ်ရာရရှိခဲ့ကြောင်း၊ KNLA တပ်မဟာ(၅)ဘက်က ထိခိုက်မှုမရှိကြောင်း ဖော်ပြသည်။
နေ့လည် ၁နာရီခွဲခန့်တွင် စစ်ကောင်စီက တိုက်လေယာဉ်တစ်စီးသည် မယ်ဝေဒေသ ထိုကော့ကျော်ခီးကျေးရွာအပေါ်ပျံဝဲကာ ဗုံးသီး သုံးလုံးနှင့် စက်သေနတ်အချက်ပေါင်းများစွာ ပစ်ခတ်ခဲ့ကြောင်း ထုတ်ပြန်သည်။
ထိုသို့ တိုက်ခိုက်မှုကြောင့် လူနေအိမ်အချို့ ထိမှန် ပျက်စီးခဲ့ကြောင်း၊ ထို့နောက်မွန်းလွဲ ၂နာရီခန့်တွင်လည်း တိုက်ခိုက်ရေး ရဟတ်ယာဉ် တစ်စီးသည် မယ်ဝေကျေးရွာသို့ စက်သေနတ်များဖြင့် ပစ်ခတ်ခဲ့ပြီး ရိက္ခာတင်ရဟတ်ယာဉ် တစ်စီးထပ်မံ ရောက်ရှိကာ မယ်ဝေတပ်စခန်းအတွင်းသို့ ရိက္ခာ၊ လက်နက်ခဲယမ်းများဟုယူဆရသည့် အထုပ်ကြီး(၈)ထုပ်အား ကြဲချပေးသွားကြောင်း ဖော်ပြထားသည်။
KNU တပ်မဟာ(၅)နယ်မြေတွင် တိုက်ပွဲများ နေ့စဉ်နီးပါးဖြစ်ပွားခဲ့ပြီး စစ်ကောင်စီတပ်ကအထိနာလျက်ရှိ၍ စစ်ကောင်စီဘက်ကလေကြောင်း တိုက်ခိုက်မှုများ မကြာခဏပြုလုပ်လျက်ရှိသည်။ပြီးခဲ့သည့် ဇန်နဝါရီလအတွင်း တပ်မဟာ(၅)နယ်မြေတွင် တိုက်ပွဲပေါင်း ၂၀၀ ကျော်ဖြစ်ပွားခဲ့ပြီး စစ်ကောင်စီတပ်က ၅၀ ဦးနီးပါး သေဆုံးကာ ၅၀ ကျော် ဒဏ်ရာရခဲ့ကြောင်း တပ်မဟာ(၅)က ထုတ်ပြန်ထားသည်။
ဇန်နဝါရီအတွင်း အကြမ်းဖက်စစ်ကောင်စီစစ်တပ်မှ လေးဝါးကျေးရွာနှင့် လာဂေါ်ဒဲကျေးရွာကို လေယာဉ်ဖြင့်ဗုံးကြဲတိုက်ခိုက်ပြီးနောက် မြင်တွေ့ရစဥ်၊ ဓာတ်ပုံ – KNU-Mutraw News
