ဗိုလ်ကြီးစောရဲမိုးအောင်နှင့် ဗိုလ်ကြီးဟိန်းမြတ်စိုးအဖွဲ့များက မီးရှို့ခဲ့ခြင်းဖြစ်ပြီး နေအိမ်ရှိပစ္စည်းများခိုးယူကြဟု ထွက်ဆို
ချင်းပြည်နယ် ထန်တလန်မြို့အား စစ်ကောင်စီတပ်က ရည်ရွယ်ချက်ရှိရှိ မီးရှို့ဖျက်ဆီးမှုများ လုပ်ဆောင်ခဲ့ကြောင်း ဇန်နဝါရီလကုန်ပိုင်းတွင် ချင်းတပ်ဖွဲ့များကဖမ်းမိခဲ့သည့် စစ်ကောင်စီတပ်နှင့် ရဲသုံ့ပန်းများက ပြောသည်။
ထန်တလန်မြို့ CB ဘဏ်အဆောက်အဦး၌ တပ်စွဲနေထိုင်ကြသည့် စစ်ကောင်စီနှင့် ရဲပူးပေါင်း အဖွဲ့တစ်ခုမှ စစ်ကောင်စီတပ်ဖွဲ့ဝင် ခြောက်ဦးကို ချင်းအမျိုးသားတပ်မတော်(CNA)နှင့် ချင်းကာကွယ်ရေးတပ်(CDF)ပူးပေါင်းအဖွဲ့က ဇန်နဝါရီ ၃၁ရက် ညပိုင်း(ဖေဖော်ဝါရီ ၁ရက် နံနက်အစောပိုင်း) ဖမ်းဆီးရမိခဲ့သည်။
အဆိုပါ ဖမ်းမိခဲ့သည့် စစ်ကောင်စီတပ်ဖွဲ့ဝင်များက ၎င်းတို့၏ အတွေ့အကြုံများကို ထွက်ဆိုရာ စစ်ကောင်စီတပ်ဖွဲ့ဝင်တစ်ဦးက ၎င်း ထန်တလန်သို့ ရောက်ရှိချိန်၌ မြို့မီးလောင်သွားပြီဖြစ်ပြီး ပြည်သူလူထုများ တစ်ဦးမှမရှိတော့ဟု ပြောသည်။
အခြား စစ်ကောင်စီတပ်ဖွဲ့ဝင်တစ်ဦးကလည်း “မီးရှို့တာကျတော့ တပ်စခန်းကုန်းမှာရှိတယ်။ သူက အခုတော့ ပြန်သွားပြီ။ အဲဒီ ဗိုလ်ကြီးကနာမည်က ဗိုလ်ကြီးစောရဲမိုးအောင်တဲ့”ဟု ပြောသည်။
အဆိုပါ ဗိုလ်ကြီးစောရဲမိုးအောင်သည် ထန်တလန် တပ်ကုန်း၌ နေထိုင်းပြီး မြို့တွင်း စစ်ဆင်ရေးလုပ်ဆောင်ခဲ့ကြောင်း ပြောပြသည်။
“တခါတလေကျ သူတို့ ဆင်းလာတယ်။ ဆင်းလာပြီး သူတို့ဟာ သူတို့မီးရှို့ပြီး ကျနော်တို့လည်း မသိရဘူး။ ကျနော်တို့က မီးခိုးထွက်မှ သိရတယ်။ ထွက်ကြည့်တော့ မီးတွေလောင်နေပြီ”ဟု စစ်ကောင်စီတပ်ဖွဲ့ဝင်တစ်ဦးက ထွက်ဆိုသည်။
အခြားတစ်ဦးကလည်း “သူတို့ တစ်ဖွဲ့တည်းတော့ မဟုတ်ပါဘူး။ ၂၆၉ အဖွဲ့ပါတယ်။ အရာရှိတစ်ယောက်ပေါ့။ ဗိုလ်ကြီးတစ်ယောက်ပါတယ်။ သူကလည်း သူ့အဖွဲ့နဲ့ သူပေါ့။ ကျနော်တို့ ရဲစခန်းမှာနေတဲ့ ဗိုလ်ကြီးဟိန်းမြတ်စိုးသူအပါအဝင်တပ်ဖွဲ့တစ်ဖွဲ့ပေါ့”ဟု ပြောသည်။
အဆိုပါ စစ်ကောင်စီတပ်ဖွဲ့ဝင်များ မီးရှို့သည့်လုပ်ရပ်ကို မြင်တွေ့ခဲ့ရကြောင်းလည်း ထွက်ဆိုကြသည်။
“မီးရှို့ပြီးရင်လည်း ဒီအတိုင်း အေးအေးဆေးဆေးမနေကြပါဘူး။ သူများအိမ်က ပစ္စည်းတွေ ထုတ် မနိုင်မနင်းတွေသယ်တယ်။ သူတို့ မနိုင်တော့မှ ကျွန်တော်တို့ကို လှမ်းပြီးခေါ်တယ်။ လှမ်းခေါ်ပြီး လာဝိုင်းသယ်ဆိုရင် ကျွန်တော်တို့က ပစ္စည်းတွေသွားဝိုင်းသယ်တယ်”ဟု ဖမ်းမိ စစ်ကောင်စီတပ်ဖွဲ့ဝင်က ပြောသည်။
အဆိုပါ ဖမ်းမိစစ်ကောင်စီတပ်ဖွဲ့ဝင် ခြောက်ဦးနှင့်အတူ လက်နက် (၇)လက်ရရှိခဲ့ကြောင်း၊ ကင်းစောင့်နေသည့် စစ်ကောင်စီတပ်ဖွဲ့ဝင်တစ်ဦး ထွက်ပြေးသွားကြောင်း ဖမ်းဆီးမှုတွင် ပါဝင်သည့် CNFတပ်သားက ပြောပြသည်။
စစ်ကောင်စီတပ်သည် ၂၀၂၁ နှစ်ကုန်ပိုင်းမှစ၍ ထန်တလန်မြို့ကို အကြိမ်ကြိမ်မီးရှို့ခဲ့ရာ ဘုရားကျောင်းနှင့် ဘာသာရေးအဆောက်အဦးများအပါအဝင် အိမ်ခြေနှင့် အဆောက်အဦး ၁,၂၀၀ ကျော် မီးလောင်ပျက်စီးခဲ့သည်။
