တောင်ငူအကျဥ်းထောင်၌ ဖမ်းဆီးချုပ်နှောင်ထားသော အကျဥ်းသား(၁၀)ဦးအား ရုံးထုတ်ချိန် စစ်ကောင်စီတပ်သားများအား ခုခံထွက်ပြေးသည့်ဖြစ်စဥ်တွင် အကျဥ်းသားအားလုံး လွတ်မြောက်ခဲ့ကြောင်း ဒေသခံသတင်းရင်းမြစ်များက People’s Spring သတင်းဌာနသို့ ပြောသည်။
စစ်ကောင်စီ၏ မတရားဖမ်းဆီးချုပ်နှောင်ခံထားရသော အကျဥ်းသား(၁၀)ဦး ယမန်နေ့(မေ ၁၈)တွင် တောင်ငူအကျဥ်းထောင်မှတဆင့် ရုံးထုတ်စဥ် လုံခြုံ ရေးလိုက်ပါလာသော ရဲနှင့်စစ်သားများအားခုခံ၍ သေနတ်များပါ လုယူနိုင်ခဲ့ကာ အကျဥ်းသားများ ထွက်ပြေးလွတ်မြောက်ခဲ့ခြင်း ဖြစ်သည်။
“အကုန် လွတ်သွားပါတယ်။သေနတ် ၄ လက်နဲ့ပါ။လွတ်မြောက်နယ်မြေရောက် ၇ ယောက်ရောက်ပြီဆိုတာညက သိပါတယ်။ ကျန်တဲ့ ၃ ယောက် ဒီမနက်ဆိုရောက်လောက်ရောပေါ့”ဟု ဒေသသတင်းရင်းမြစ် Taungoo Revolution News မှ တာဝန်ရှိသူတစ်ဦးကPeople’s Springသို့ ပြောသည်။
ရုံးထုတ်ချိန် စစ်ကောင်စီတပ်သားများအား ပြန်လည်ခုခံပြီး ထွက်ပြေးလွတ်မြောက်သွားသူ(၁၀)ဦးသည် ၄၉(က)၊ ၅၀ (က)၊၅၀(ည)၊ ၅၁(ဂ)၊ ၅၂(က)စသည့်ပုဒ်မများတပ်ကာ စစ်ကောင်စီ၏ မတရားဖမ်းဆီးချုပ်နှောင်ခြင်းကို ခံနေရသူများ ဖြစ်သည်။
ထို့ကြောင့် ယခုကဲ့သို့ စစ်ကောင်စီလက်ပါးစေများအားခုခံ၍ ထွက်ပြေးယုမျှမက ရန်သူ့ထံမှ လက်နက်များရအောင် စွမ်းဆောင်နိုင်ခဲ့ကြသည်ဖြစ်ရာ”အကျဥ်းသားအားလုံးလွတ်မြောက်ကြပါစေ”၊ “ကူညီသူများနှင့်တွေ့ပြီး ဘေးအန္တရာယ်ကင်းကြပါစေ”၊ ကျန်း မာသက်ရှည်ကြပါစေ”စသည့် ဆုတောင်းစကားများဖြင့် ပြည်သူများက လူမှုကွန်ရက်များမှတဆင့် အားပေးဝန်းရံမှုအများအပြားကိုတွေ့ရသည်။
သို့သော်စစ်ကောင်စီတပ်အသိုင်းအဝိုင်းနှင့်၎င်းတို့ကိုထောက်ခံသော အသိုင်းအဝိုင်း၌မူ”တောင်ငူဖြစ်စဥ်ကရဲတွေအပြင် စစ်သားတွေပါရက်နဲ့ ကိုယ့်ဘက်ကညံ့တာ”၊ “လူကြီးမင်းတို့ ကြားကောင်းအောင်လည်းလုပ်ကြပါအုံးလား”စသဖြင့် အချင်းချင်းပြစ်တင်ပြောဆိုမှုများ၊ အားမလိုအားမရ ငြီးတွားသံများကို လူမှုကွန်ရက်စာမျက်နှာများတွင်ရေးသားဖော်ပြခဲ့ကြသည်။
