စစ်ကိုင်းတိုင်း၊ မြင်းမူမြို့နယ်တွင် စစ်ကောင်စီတပ်က PDF ရဲဘော်တစ်ဦးနှင့် ပြည်သူ သုံးဦးကို သတ်ဖြတ်သွားကြောင်း ဒေသတွင်းသတင်းရင်းမြစ်များက ပြောသည်။
ဇူလိုင် ၆ရက်က စစ်ကိုင်းမြို့နယ်၊ တပ်မ(၃၃) စစ်ကောင်စီတပ်သည် ညောင်ပင်ဝန်းကျေးရွာမှတဆင့် အင်အား ၅၀ကျော်ဖြင့် နဘဲကြူးရွာနှင့် မကျီးကန်ကျေးရွာသို့ ဝင်ရောက်ခဲ့သည်။
အဆိုပါ စစ်ကြောင်းကို ညနေ ၅နာရီခွဲခန့်တွင် လက်လုပ်(၈၁)မမ ဗုံးသီး အလုံး၂၀ဖြင့် တိုက်ခိုက်ခဲ့ကြောင်း ဒေသတွင်း တော်လှန်ရေးအင်အားစုများက ပြောသည်။
စစ်ကြောင်းသည် ဓားစာခံဖမ်းဆီးခေါ်ဆောင်လာသည့် နဘဲကြူးရွာမှ ပြည်သူ သုံးဦးနှင့် ညောင်မြစ်ရွာမှ တစ်ဦးအား သတ်ဖြတ်သွားကြောင်း မြင်းမူမြို့နယ် သတင်းမှန်ပြန်ကြားရေးအဖွဲ့က ပြောသည်။
သတ်ဖြတ်ခံရသူ လေးဦးအနက် PDFရဲဘော်တစ်ဦးပါဝင်ကြောင်း Myinmu PDFအဖွဲ့ ပြန်ကြားရေးတာဝန်ခံက အတည်ပြုသည်။
“မနေ့က ဖြစ်စဥ်မှာ ခွေးနှစ်ကောင်ကျပြီး ကျွန်တော်တို့ဘက်က ပြည်သူ ၃ဦး ရဲဘော်တစ်ဦးကျတယ်။”ဟု Myinmu PDF အဖွဲ့ ပြန်ကြားရေးတာဝန်ခံက ပြောသည်။
ယနေ့နံနက်ပိုင်းတွင် စစ်ကောင်စီတပ်သည် ဂုံညင်းဆိပ်ကျေးရွာကို မီးရှို့သွားပြီးပျက်စီးမှုအခြေအနေ မသိရသေးကြောင်း ဒေသခံများက ပြောသည်။
မြင်းမူ – ထီးဆောင်း – အရာတော် လမ်းပိုင်း၌ စစ်ကြောင်းများရှိနေ၍ ထိုလမ်းပိုင်းအား သွားလာခြင်းမပြုရန် ဒေသတွင်းတော်လှန်ရေးအင်အားစုများက သတိပေးထားသည်။
