စစ်ကိုင်းတိုင်း၊ မြင်းမူမြို့နယ်ရှိ မူးမန္တလေးကျေးရွာအား စစ်ကောင်စီတပ်က မီးရှို့ဖျက်ဆီးနေ၍ ဒေသခံများ ညတွင်းချင်းထွက်ပြေးနေရကြောင်း သတင်းရရှိသည်။
ယနေ့ (ဇူလိုင် ၁၇ ရက်) ညနေပိုင်းက မူးမန္တလေးကျေးရွာအနီးတွင် စစ်ကောင်စီတပ်နှင့် ဒေသတွင်း PDFများ တိုက်ပွဲဖြစ်ပွားခဲ့ကြောင်း၊ ထိခိုက်ဒဏ်ရာရသွားသည့် စစ်သားများအား ထီးဆောင်းကျေးရွာသို့ သယ်ဆောင်သွားကြောင်း ဒေသကာကွယ်ရေးရဲဘော်တစ်ဦးက ပြောသည်။
![(မီးရှို့ဖျက်ဆီးခံနေရသော မူးမန္တလေးကျေးရွာအား တွေ့ရစဥ်။ ဓာတ်ပုံ-စစ်ကိုင်းမြို့နယ် သတင်းမှန်ပြန်ကြားရေး)](https://i0.wp.com/www.ludunwayoo.com/wp-content/uploads/2023/07/361627957_616563647209098_6292248159697909067_n.jpg?resize=720%2C540&ssl=1)
ထို့နောက် ညနေ ၆ နာရီခန့်တွင် စစ်တပ်က မူးမန္တလေးရွာအား လက်နက်ကြီးများဖြင့်ပစ်ခတ်ကာ ဝင်ရောက်ခဲ့ကြောင်း၊ ည ၇ နာရီခန့်တွင် မူးမန္တလေးကျေးရွာအား မီးရှို့ဖျက်ဆီးနေ၍ ထိုကျေးရွာအပါအဝင် အနီးဝန်းကျင်ကျေးရွာများပါ ညတွင်းချင်းတိမ်းရှောင်နေရကြောင်း စစ်ကိုင်းမြို့နယ် သတင်းမှန်ပြန်ကြားရေးအဖွဲ့က ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
“အလ္လကပ္ပနဲ့ညောင်ပင်ကန်ဘက်ကို တစ်ကြောင်းထွက်သွားတယ်။ နောက်တစ်ကြောင်းက မူးမန္တလေးဘက်ကို မီးရှို့နေတယ်။”ဟု ဒေသတွင်းရဲဘော်တစ်ဦးက ပြောသည်။
![(မီးရှို့ဖျက်ဆီးခံနေရသော မူးမန္တလေးကျေးရွာအား တွေ့ရစဥ်။ ဓာတ်ပုံ-စစ်ကိုင်းမြို့နယ် သတင်းမှန်ပြန်ကြားရေး)](https://i0.wp.com/www.ludunwayoo.com/wp-content/uploads/2023/07/361617854_616563743875755_4215903889308659550_n.jpg?resize=720%2C540&ssl=1)
ယမန်နေ့ (ဇူလိုင် ၁၆ ရက်) ညပိုင်းကလည်း စစ်ကောင်စီတပ်သည် မြင်းမူမြို့နယ်၊ မဲနောကျေးရွာကို မီးရှို့ဖျက်ဆီးခဲ့ရာ နေအိမ် ၁၀၀ခန့် ပျက်စီးဆုံးရှုံးခဲ့ကြောင်း မြင်းမူမြို့နယ် သတင်းမှန်ပြန်ကြားရေးအဖွဲ့က ပြောသည်။
စစ်ကောင်စီတပ်သည် မြင်းမူနယ်အတွင်းရှိ ကျေးရွာများကို ဇူလိုင် ၆ ရက်မှစတင်ကာစစ်ကြောင်းထိုးပြီး ကျေးရွာ လေးရွာထက်မနည်း မီးရှို့ထားပြီး ဖမ်းဆီးသတ်ဖြတ်ခံရသူများလည်းရှိနေကြောင်း ဒေသခံများက ပြောသည်။
ထို့အပြင် ဇူလိုင် ၁၃ ရက်ကမူ စစ်ကောင်စီတပ်နှင့် ဒေသတွင်း PDF အဖွဲ့များ ခွက်ခွင်းရွာအနီး တိုက်ပွဲဖြစ်ပွားပြီး စစ်အုပ်စုအထိအခိုက်များကြောင်း တော်လှန်ရေးအင်အားစုများက ပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)